Russia coach a bang

Russia coach Leonid Slutsky chuan Euro 2016-ah group stage an paltlang zawh loh avangin banna a thehlut. Russia hi group B mawngphahah awmin an match hmasa bera England (1-1) nen an inhnehtawk hnuin Slovakia (2-1) leh Wales (3-0) an hneh lo.

World Cup 2018 thleng tur Russia hi group stage aṭanga an tlak mai piah lamah an fan-ten buaina an siam nasat avangin UEFA chuan buaina an siam leh chuan Euro 2016 aṭanga paihchhuah an nih tur thu an hrilh a, result mai piah lamah fan-te khawsak dan hi Slutsky-a ban chhan zinga telah ngaih a ni.

Kum 45-a upa mana-ger chuan, "Hetiang tournament duhawm lo kan hmang a nih chuan major tournament-a kan ram hruai zel tlakah ka inngai lo," tiin a ban chhan a sawi.

Russia hian Euro 2016 qualifying-a beisei an phak loh hnuin Fabio Capello an ban a, a aiawh turin CSKA Moscow boss ni bawk Slutsky hi an ruai. Russian manager hian qualifying round-a Russia match hmabakah hnehna chanpui vekin Euro a hruai thleng.

CSKA Moscow tana league nomawi pathum chawi tawh coach hi Euro 2016 tawp thleng cham tura contract ziahpui a ni hrim hrim a, mah se Football Union of Russia chuan Euro zawhah CSKA Moscow emaw an ram team enkawl thlang zawk tura tiin contract thar pek an hnial lo a, heti chung hian Russia coach a nihna aṭanga banna a thehlut ta zawk a ni.