Inter Milan-in Toure an ngaihven

Italian club lian Inter Milan chuan Manchester City midfielder Yaya Toure an ngaihven hle nia sawi a ni.

Kum 33-a upa Toure hian Etihad Stadium-ah kum khat cham turin contract a la nei mek a, mahse season tharah City hi Pep Guardiola-a'n a enkawl dawn avangin chhuah a hreh lo nia sawi a ni.

Spanish manager Guardiola hian Toure hi kum 2010 khan Barcelona aṭangin khatih laia Man-chester City manager Roberto Mancini hnenah a lo hralh tawh.

Season thum chhung Bundesliga-a Bayern Munich champion puitu Guardiola hian Borussia Dortmund aṭangin mid-fielder Ilkay Gundogan a la lut tawh a, Catalan club lama a lo enkawl tawh Toure hi chhawr nawn a tum lo tiin khawthlang media-te chuan an tarlang.

Guardiola hian Toure hi a player duh ber a nih loh zia a lo lan tir tawh a, 2009 Champions League final-a Manchester United an hneh ṭum pawhin central defence-ah a khelh tir daih nghe nghe.

Inter Milan hi tun hnaiah Europe-a club hlauhawm berte zingah an tel phak meuh tawh lo a, Jose Maourinho kaihhruaina hnuaiah 2010 Champions League nomawi chawi mah se a hnuah beisei an phak tawh lo. Season hmasa khan league-ah palina an ni phak ṭawk a, Chinese sumdawng hausa neitu thar hnuaiah intuai thar an tum mek a ni.