Blanc a chhuak dawn chiang - agent

Laurent Blanc chuan Paris Saint-Germain a chhuhsan dawn tih a chiang tawh a, tun kar tawp hian a chhuah hman mai theih thu a agent chuan a sawi.

French manager Blanc hian tun hnaiah PSG hi hlawhtlinna tam tak a chanpui a, season hnih liam ta phei kha chuan treble champion a nih pui ve ve. Mahse, club president Nasser Al-Khelaifi chuan hengte hi la duhkhawp loin Europe-a champion ngei a duh.

Ligue 1 champion PSG hi Cham-pions League-ah an la hlawh-lting thei lo a, season liam ta pawh khan Manchester City hneh loin quarterfinal aṭangin an tla.

Blanc-a agent Jean-Pierre Bernes chuan, "February 10 khan kum hnih daih contract a ziak thar a, club thuneitu lam hian a contract-a inziak ang te an zah sak turah pawh ka ngai. Tunkar tawp hian PSG leh Blanc chu an inṭhen ang," tiin a sawi.

Tun hnai kum thum chhung a zawna Europa League champion ni thei Sevilla coach hlui Unai Emery chu Blanc-a hmunruak luah tura hming langsar ber a ni mek. Spanish club Sevilla hian Emery hmunruak luahkhat turin Jorge Sampaoli an la lut thung ang.