Napoli-ah Higuain a nghet - president

Gonzalo Higuain chuan club dang a ngaihven loh thu leh Napoli-ah a ngheh thu club president Aurelio De Laurentiis chuan a sawi chhuak.

Real Madrid-ah hmun nghet a chan lo hnuah Argentine striker hi Serie A-ah insawnin season duhawm tak a hmang zo chiah a, league match 35 a khelh aṭanga goal 36 khungin an club chanchina season khata goal khung hnem ber niin season tharah Champions League a khelh pui dawn.

Europe club lian hrang hrang Paris Saint-Germain, Chelsea, Atletico Madrid leh Chelsea te chuan kum 28-a upa Higuain hi lakluh an duh nia sawi a ni.

An player duhlai chanchin sawiin De Laurentiis chuan, "Higuain hian a hun tawp thlengin Napoli tan khel se tih hi ka duhdan a ni a, ani pawhin a rilru tak tak a sawi a nih chuan he hmunah hian kum nga chhung vel tal a la cham chhunzawm ang," tiin a sawi.

Tunah chuan Higuain hi Copa America Centenario khelin Argentina team-ah a awm mek a, quarterfinal-a Venezuela 4-1 a an hneh ṭumin goal hnih a khung nghe nghe. Tukin khan a thlengtu United States nen semifinal an khel zui leh bawk.