Euro 2016 Slovakia laka chak zo lo England-in last 16 lut

Thawhṭanni zan Euro 2016 inkhelah England-in hnehna chang zo lo mah se pahnihna dinhmun luah chungin last 16 an lut a, Group B-a an match hnuhnung berah Slovakia nen goal khung loin an inhnehtawk.

England-in an match hnuhnung bera Wales an hneh ṭumin substitute bench aṭanga tlan lut Jamie Vardy leh Daniel Sturridge-te chu danglamna thlentu an ni a, striker pahnih hi Slovakia laka bul ṭantir turin England manager Roy Hodgson-a'n nawrtu a ngah hle.

Mahse, Liverpool boss hlui hian Harry Kane leh Raheem Sterling dah ṭhain striker pahnih hi inkhel bul a ṭan tir a ni mai lo a, sawisel huamin Wayne Rooney, Kyle Walker, Danny Rose, Dele Alli-te aiah Jack Wilshere, Nathaniel Clyne, Ryan Bertrand leh Jordan Henderson te inkhel bul a ṭantir a, thutlukna huaisen thlak tak a siam.

Inkhel chu

Jordan Henderson-a'n Jamie Vardy tana ball a siamsak chu England-in chance hlauhawm tham an neih hmasak ber a ni a, Leicester City striker hi ball um tura a tlan chakna hmuh hmaih theih ni lo mah se Slovakia keeper Matus Kozacik hmaah a class tawk lohna a lang a, Sergio Aguero te goal khungna ang chiah a khung lo.

Second half-ah Slovakia keeper Matus Kozacik kan hmuh chhunzawm a, Nathaniel Clyne-a goal shot ṭha takin a dang a, Martin Skrtel chuan substitute Dele Alli goal khung tur nia ngaih chu line aṭangin a lo pet chhuak hman bawk.

Slovakia-in point khat hlawh chhuak pawh nise Russia an hneh tawh avangin last 16 luh theihna hun ṭha an nei tih an hria a, England goal-a khung tum aiin goal chhuah loa inhnehtawk an pawi ti lo. England-in Slovakia defending game fing an ngam lo a, team pahnihin point an insem.

Ṭangkai lo Wislhere

Roy Hodgson-a'n huaisen takin thutlukna a siam a, a thutlukna siam zinga langsar ber chu Jack Wilshere a ni. Arsenal midfielder hi hliam damkawr chungin Euro 2016-ah a hruai a, Russia laka minute rei lote a khelh hnuah Wales lakah chawl hahdamin Slovakia lakah bul a ṭan a, khelmuala minute 55 hun a hman chhungin beisei a phak lo tluan chhuak zak.

Hodgson-a'n inkhel bul a
ṭan tir zingah Nathaniel Clyne leh Jordan Henderson-te an khel ṭha a, Liverpool defender Clyne hian England tan chance vawi sarih lai siamin kum 1980 hnua major tournament-a England tana match khata chance siam hnem ber a ni.

Hodgson an dem

Kum 68-a upa Hodgson-a'n group hruaitu an nih theihna inkhelah a player pawimawh ho hahchawlhtirin a thlak danglam nasa a, England manager hian sawisel a tawk nasa hle.

England captain hlui Alan Shearer chuan, "Hodgson-a thutlukna hi ka pawmpui lo a, tun hi inthlak danglam hun a ni lo. Euro '96-ah khan Scotland kan hneh hnuah inrintawkna nasa tak neiin Netherlands 4-1 in kan sawp zui a, Roy-a leh a naute tan Slovakia an hmachhawn kha inrintawkna an siamna remchang a ni," tiin Roy chuan thutlukna dik lo a siam niah a ngai.

Hetihrual hian England midfielder hlui Danny Murphy chuan, "Mi tam takin min beisei aiin kan khel ṭha a, hma kan sawn chak hle. Group-a pahnihna nichunga last 16 luh hi a chhiatna em em ka hre lo. Tuna kan England team en hian a ṭha lam hmuh tur hi keichuan ka hmu hnem zawk," tiih Hodgson a fak thung.

Thutlukna dik?

Hodgson-a'n dem a hlawh a, hriat reng atana ṭha erawh England boss-in starting eleven-ah player paruk a thlak a, match hmasa pahniha inkhel bul ṭantu aia lutte hi an chhe hluai a ni chuang lo a, an players thlakte hi world class ṭhiau an nih bik loh avangin dem chiamna tur a awm chuangin a lang lo.

English manager hian last 16 thlir ranin thutlukna finthlak tak a siam niin a lang. Group B-ah hmahruaitu nise chuan team ṭhaa chhiar tel tlak ṭhiau Germany, Poland emaw Croatia tum thei dinhmunah an ding a, pahnihna an nih hian Group F-a pahnihna an tum dawn a, Iceland, Portugal, Austria emaw Hungary an tum dawn tihna a ni - a hmaa team pathum kan tarlan ai khi chuan tum an châkawm zawkin a lang.

Hetihrual hian England hian last 16 an paltlang leh a nih chuan quarterfinal-ah a thlengtu ram France tum theihna dan an nei dawn - England hian semifinal an thleng a nih chuan hlawhtlinnaah chhiar a ni ang a, quarterfinal an paltlang zo lo a nih erawh chuan Euro zawh ruala a contract tawp tur Roy Hodgson-a dawhkanah contract thar chhawp a ni lo ang.

Hlauh nei lo Roy

England-in Slovakia an hmachhawnna inkhelah goal shot vawi 30 zet an nei a, Slovakia net tawn puar zo erawh a awm lo. Roy Hodgson chuan, "Engtikah emaw chuan kan khingpui goal lama kan pet zozai hi a la lut em em ang. Tuna kan khelh dan en hi chuan tumah hlauh ka nei lo," tiin a
ṭawng pawr hle.

Hodgson chuan sawi chhun-zawmin, "Hnehna chang ni ila chu min sawiseltute hian ka player thlak takte tel loa kan ṭhat tawkzia an sawi ang, kan chak loh avangin duhthlanna ka siam sual thu nuamti takin an sawi a, hetiang hi chu ka tuar ṭhang tawh a ni. Pahnihna kan nih avangin kan lawm lo a, mah se last 16 kan lut tho," tiin amah sawiseltute a chhang let.