Champion rinkai Pliskova a tla

Western and Southern Open khelh laiah hmeichhe singles lama champion rinkai Karolina Pliskova a tla a, seeded pahnihna Sofia Kenin pawh hneh nei loin a match hmasa berah a zinkawng a tawp ve nghal bawk.

Seeded pakhatna Pliskova hi first round-ah a bye a, nimin zing khan last 32 aṭangin a inlan. Czech Republic nula hi chak tura rinkai ni mah se beisei loh takin Veronika Kudermetova lakah 7-5, 6-4 in a chak lo. Australian Open champion Kenin pawhin beisei a phak bik lo, player langsar lo leh seeded pawh chang phak lo Alize Cornet lakah 6-1 7-6(7) in a chak lo. France nula Cornet hian set hmasa zawkah phei chuan point 10 bak a hloh lo, a khingpui hi game khat chauh a laktir.

Kenin chuan, "Ka khelh dan phung pangngaiin ka khel chhuak thei lo reng reng, eng vanga khel ṭha thei lo nge ka nih pawh ka hre mai lo. US Open inbuatsaihna hun tlemte ka la neih hi a ṭha thei ang bera hman ka tum ang," a ti. March thla aṭang khan coronavirus vangin tennis an chawl lailawk a, tun thla chhungin inelna ṭhenkhat ṭan leh tawh mah se Western and Southern Open hi mipuiin an ngaihhlut zinga an khelh leh hmasak ber a ni.