Mumang ramah Wales an chêng

England hneh lo hlim Wales an tlu rei lo, an group match hnuhnung berah Russia 3-0 a sawpin an hneh loh England lehpelin hmahruaitu an ni a, kum 58 hnua an major tournament hmasa berah last 16 an lut nghal - mumang ramah an chen chhunzawm zel.

Wales tan Aaron Ramsey leh Neil Taylor ten first half-ah goal an khung a, Gareth Bale chuan second half-ah tun inelnaa a goal thumna a khung ve leh bawk. Real Madrid forward hi Euro 2004-a Milan Baros leh Ruud van Nistelrooy ten an group match thuma goal an khung vek hnua group stage match-a goal khung vek thei hmasa ber a ni.

Gareth Bale chuan, "A ropui thlawt a ni. Kan tan chuan engkim hi mumang ang mai a ni a, ropui takin hnehna kan chang a ni. He game hian engkim a thlak danglam thei tih kan hria a, kan kutah engkim a awm avangin nuam ti taka khel turin kan inchah a ni. Kan khelh dan kha nuam ka ti a, Euro-a kan match ṭhat ber ṭum a ni," tiin a hlim hle.

Wales-in last 16 an paltlang chuan Germany tum theihna chance a awm. Mahse, Wales boss Chris Coleman a zam lo. Kum 46-a upa manager chuan, "Tupawh hi kan zah em em vek. Mahse, Russia kan hmachhawn dana kan khel zel a nih chuan tu nge hlauh tur awm ang?" tiin hlauh a nei lo.