Belgium nge Sweden tlang dawn?

Group E-ah Italy-in hmahruaitu nichungin Euro 2016 last 16 an lut chiang tawh a, zanin dar 12:30 hian Nice-ah Belgium leh Sweden ten Azzurri hnungzui tur an zawng ang. Republic of Ireland pawhin beisei tur an la nei a, Lille-ah Antonio Conte-a hote an hmachhawn ang.

Belgium-in Italy an hneh lo hnuah harhtharna an chang a, Romelu Lukaku goal hnih leh Axel Witsel te goal hmangin Republic of Ireland chu 3-0 in an sawp. Red Devils chak ṭum hian Manchester City midfielder Kevin de Bruyne leh Chelsea midfielder Eden Harzad te an khel ṭha a, point thum an hmuh tawh avangin pahnihna dinhmun hauh turin Sweden laka point khat hlawhchhuah a tawk.

Sweden hian kum 1961 khan Belgium hi 2-0 in an hneh a, hemi hnu hian Red Devils hi an la hneh leh lo. Euro 2000 khan Belgium-in Sweden hi 2-0 in an hneh a, Marc Wilmots hi Red Devils player pawimawh zingah a tel.

Belgium midfielder Mousa Dembélé leh Yannick Carrasco te chu inhliam vangin an dinhmun a chiang lo a, player dang zawng erawh Marc Wilmots-a tan chhawr theih vek an ni. Belgium captain Eden Hazard chuan, "Sweden hmachhawn turin kan inpeih tawh a, goal khung an mamawh dawn avangin attacking football an khelh a ṭul dawn. Keini chuan counter attack hmangin kan bei let thei ang," tiin dinhmun ṭha zawk an nih thu a sawi.

Thawhlehni khan Sweden-in mipui hmuh theih turin training an nei a, veteran player Zlatan Ibrahimovic leh Kim Kallstrom te erawh mipui hmuha inlan aiin hotel gym-a insawizawi an thlang zawk. PSG tana season ṭha tak hmangtu Ibrahimovic-a'n goal a la khung lo a, beisei a la phak lo. Hemi chungchang hi sawiin Sweden left back Martin Olsson chuan, "Ibra hi a la vanduai rih mai mai a ni. Belgium nena an inkhelh hunah a theihna tak tak kan hmuh tawh ka beisei. Chutihrualin tuna a khelhṭhat loh avang hian a buai phah lo a, kan zingah awmin fiamthu thawhtu ber a ni," tiin an captain chungchang a sawi.