LZ Juice MPL11 : SYS FC-in champion lai Police an hneh
LZ Juice MPL11-ah SYS FC-in champion lai Mizoram Police 3-2 in an hneh a, Lunglei club hi dah hniam theih an ni lo. Coach Lalmuankima hote hian match thum khelh tawhah chak loh an la nei lo a, point sarih an hmu tawh. Police erawh a zawnin match hnih an chak lo a, table chanve hnuai lamah an awm.
RG Stadium-a inkhelah hian Police-in hmahruaina goal khungin, SYS defender Vanlalhriatrenga'n an lamah a tilut a, SYS-in goal chhuah hma mah se Ricky H. Vanlalhriatsanga goal hnih hmangin an lehthal. Police-in rawlthar duhawm Michael Lalbiaksanga hmangin si phurh sut mah se SYS captain Lalruatsanga'n chakna goal a khung.
A goal hma
Mizoram Police-in bul ṭantu zingah R. Malsawmtluanga an rawn dah let a, tawnhriat nei ṭha player tamna team-in bul an ṭan ṭha. Malsawmfela hoin Police an nung a, SYS an insiamrem thei lo.
Minute linaah Police-in corner kick an hmang ṭangkai a, H. Sanglianmawia ball tauh ṭha chuan SYS defender Vanlalhriatsanga perin goal-ah a lut. Police an phur chhunzawm a, mahse chhun ni sa hnuaia inkhel an nih avangin SYS an vanneih phah.
Police-in Sawmfela hmangin mawi takin ṭum thum vel zetin SYS tlarhnung an chhu pawp a, mahse Michael-a a la naupang hret. Hun pawimawhah Michael-a rilru a fim tawk loh avangin SYS-in goal an chhuah belh lo.
Ricky show
SYS an insiamṭha a, defensive midfielder Joel Lalramengmawia a ṭangkai a; Mesak C. Lalrinngheta leh Ricky Hlichhal te an hmuhnawm. Lunglei club-in ball an chang tam a, an phu angin si phurh an sut.
Minute 36-naah SYS-in freekick an hmu a, Ricky-a'n wall pet perin goal kilah a lut a, keeper F. Lalmuanawma tan dan a harsa. Injury time-ah SYS-in an khung belh a, captain Ruatsanga'n Police defender Lalhmunmawia (Ahmuntea) tlan pelin a ball pass ṭha chu Ricky-a'n a pet goal.
A tawpah SYS
Second half-ah Police in bul an ṭan fuh a, tlarhnung aṭanga ball petchhuah satliah anga lang chu Sawmfela'n tauh pialin Michael-a'n a um lut a, Tlangmawi rawlthar hian minute 51-naah cool zetin a pet goal.
Police-in 2-2 a nih hnuah Sawmfela leh MS-a te an thlak a, goal khung belh an tum. Lalbiaksanga Colney hote hi chak leh mai tura ngaih theih ni mah se set piece an hmang ṭangkai thei lo a, defender Ahmuntea'n box chhung aṭangin ball a tauh fuh tawk ṭhin lo.
SYS captain Ruatsanga a hunah tak a rawn inlar a, minute 79-naah Andreas Lalhmingmuana nen mawi zetin Police tlarhnung an ṭhiat. Ruatsanga'n keeper Muanawma chauh a hmachhawn a, keeper kap karah khungin chakna goal a khung. Hun tawp lamah SYS an chungnung a, harsatna nei loin 3-2 in hnehna an chang.
SYS coach Lalmuankima chuan, "Police hneh hi kan tan chuan chanchin lawmawm a ni. Point thum hlu tak kan hlawh chhuak a, ka naute khelh danah ka lawm. Chutihrualin season kan la ṭan chauh a, semifinal sawi nan a la hma mah mah. Hmabak thui tak a la awm," tiin Vanglaini a hrilh.