Aizawl FC tan player thar Sawma Tlangte

LZ Juice MPL11-ah Aizawl FC chuan Ramhlun Athletic 3-2 in an hneh a, I League club hian match thum aṭanga point sarih hmuin pahnihna an ni. Nimin RG Stadium-a inkhelah Aizawl FC point hloh thei dinhmunah an ding a, minute 80-naah pawh 2-2 la ni mah se player thar Malsawmzuala Tlangte-in chakna goal a khung.

Tlai boruak nuam takah AFC leh Ramhlun ten football hmuhnawm an chhawp chhuak a, Danny Lalduhawma kaihhruai Ramhlunin bul an ṭan chhe lo a, goal khung chance ṭha pawh an nei. Richard Lalramnunpuia'n goalkeeper Joel B. Lalramchhana rawn tlan chhuak hmuin goal-ah a pet a, woodwork a pet per.

Aizawl FC-in an chance neih hmasak khung lo mah se goal mawi bik hmangin hma an hruai. BD-a ball vawrhluh mawi zet chu C. Lalhriatpuia'n box chhungah la thlain, a ball pek chu box pawn aṭangin Muanpuia'n ṭha zetin minute 38-naah a khung.

Minute hnih hnuah Ramhlunin an chhanglet a, midfielder khel ṭha Isak Vanlalpeka'n ṭha zetin ball a la chhuak a, Richard nena an inthlawp hnuah Opitea tan chance ṭha siamin Armed Veng tlangval hian a inzir chhuahna Aizawl FC lakah ṭha zetin a pet goal.

First half-ah 1-1 a ni a, second half-ah Aizawl FC-in player thar Sawma Tlangte leh Peter Lalrinhlua te an luhtir. I League club-in inkhel thunun hretin Lalrempuia ball vawrhluh chu BD-a'n vawi khatnaah pet goal thei lo mah se a per chu chiang zetin a pet goal.

Ramhlun an beidawng lo, substitute R. Lalchhantluanga'n penalty hlawh chhuakin Serchhip tlangval Felix-a'n minute 75-naah siphurh sutna goal a khung. Felix hian match thumah goal khung vekin goal li a khung tawh.

Aizawl FC talbuai hman mah se minute 83-naah corner kick an hmang ṭangkai a, Sawmtea Tlangte-in minute 83-naah chakna goal a khung. I League club 3-2 in an chak a, round 4-ah league hmahruaitu Chanmari FC nen an inkhel dawn - inkhel hmuhnawm bik a ni ang.