Paris Olympics : Mi 257 awmna Indian contingent

Infiamna khawmpui hian Paris Olympic 2024 hmachhawn turin ram hrang hrang an inbuatsaih mup mup - India pawhin theihtawp a chhuah, inelna neihna tur hmunah hian mi 257 a tir chhuak dawn a ni.

Indian contingent-ah hian infiammi 117 an ni dawn a, heng bakah hian support staff mi 140 an awm dawn bawk - Tokyo Games neih ṭum khan India hian infiammi 121 a lo tir tawh, tun ṭumah hian inlan phak tam lamah a tluk lo hret.

Indian Olympic Association chief PT Usha chuan, "Infiammi bakah support staff zinga 67 chu Olympic Village chhungah an thleng ang, hei hi Paris Organising Committee lamin an ruahman dan chin a ni.

"Anni bakah mi dang 72 te chu sorkar kaihhruaina hnuaiah game Village bul hnaiah an thleng thung dawn a ni," a ti a, engkim ruahmanna fel taka neih a ni tawh tih a sawi bawk.

Tokyo Olympic 2020 neih ṭum khan India hian medal pasarih nen Japan ram khawpui an chhuahsan a, infiamna khawmpui liana medal an lak hnem ber ṭum a ni a, kuminah hian khum ngei an tum dawn a ni.

Paris Olympic hi July 26, Zirtawpni aṭangin August 11, Pathianni thleng neih a ni ang - infiamna peng hrang hrangah khawvela a ṭha ber berten inelna an hmachhawn ang.

India medal beisei sannate

Neeraj Chopra:

Fei khawh (juvelin throw) huangah a inlan dawn a, ani hian Olympic hmasa khan gold medal a lo khawh chhuak tawh a, tun ṭumah pawh hian medal la leh thei tura beiseina a sang hle.

Kum 26 mi Neeraj Chopra hian vanglai a hmang mek - thla hmasa mai pawh khan Paavo Nurmi Games-ah inlanin a che ṭha viau. Tun dinhmunah mimalin Saarbrucken, Germany-ah training a nei a ni.

PV Sindhu: 

A zawna a vawi thum nan PV Sindhu hian Olympic a khel dawn, a inlan hmasakah silver leh bronze medal a hlawh chhuak a, tun ṭumah pawh hian rinkai zinga mi a ni.

Group match hmasa lamah chuan amah aia ranking hniam leh player ṭha lo zawk a hmachhawn dawn a, chutihrualin a kaltluang a nih chuan quarterfinal-ah champion lai Chen Yu Fei a hmachhawn thei dawn, hna a hautak hle ang.

Vinesh Phogat:

Inchai chak Vinesh Phogat hi wrestling ngaina tute chuan a hre lar viau ang. Tun hnai khan Grand Prix of Spain-ah inlanin final-ah Mariia Tiumerekova chu 10-5 a hnehin a champion.

Hmeichhe wrestling 50kg category-ah a inlan dawn. Spain khawpui Madrid-ah training a nei chhunzawm a, infiamna khawmpui lian atan a bei ngawrh hle, medal a la a nih pawhin a mak lo ang.

Sat-Chi: 

Satwiksairaj Rankireddy leh Chirag Shetty te hi mipa badminton doubles huanga inkawp fuh tak an ni a, season hmasa an hmang ṭhain khawvela a ṭha berte zinga mi an ni phak a, rinkai pawh an ni dawn.

Mahse, May thla tawp lam aṭang khan Badminton World Federation hnuaia inelnaah an la inlan leh lo. Paris Olympic-ah hian seeded pathumna an ni phak a, a tir lamah All England champion lai Fajar Alfian leh Mohammad Ardianto te nen an inhmachhawn nghal dawn a ni.

Men's hockey:

Inbuatsaihna an nei ngawrh hle - hun rei tak chhung chu Bengaluru-ah an training a, chumi hnuah Switzerland panin tunah tak chuan Netherlands-ah an awm mek. July 20 hian Paris khawpui an thleng tawh ang.

India hian hockey a ngaihlu a, medal lak an duhna pawh a sang. Mahse, ram dang ṭha tak tak an tam avangin a awlsam lo, kuminah hian hmeichhe team chu an inlan ve phak dawn lo a ni.

Nikhat Zareen:

World champion a ni mek a, hmeichhe boxer ṭha leh huaisen niin khawvel huapa vawi hnih champion tawh a nih avangin engti kawng zawng mahin dah hniam theih a ni lo, ram dang pawhin an huphurh ve tak tur a ni ang.

Kumin May thla khan Elorda Cup a hmachhawn a, a hnu lamah chuan inelna a hmachhawn tawh lo - Olympic atan a inbuatsaih chhunzawm ta ngar ngar a ni. Saarbrucken, Germany-ah training in July 22 hian Paris a lut dawn a ni.

Mirabai Chanu: 

Olympic silver medalist Mirabai Chanu-i hi a hmel leh pumrua aṭanga teh chi a ni lo, theihna nei sang leh mi bik a nih avangin a hming hi khawvel hriat a ni a, Mizoram ṭhenawm mai Manipur mi a ni.

Nikum aṭang khan hliamin a tlak buak fo a, mahse Paris Olympic hmachhawn tur erawhin a dam hman. Training a neihna lama a chet dan chuan snatch 90kg leh clean & jerk 115kg chawi theih a inbeisei a, hetiang a tlin a nih chuan medal a lak ngei a rinawm.