Tuin nge Ballon d'Or dawng ang?

Euro leh Copa America khelh zawh a ni a, tuna zawhna langsar ber chu tuin nge Ballon d'Or dawng ang? tih chu a ni - inelna ṭan a nih hma kha chuan Vinicius Jr leh Jude Bellingham te hming a ri ring dun hle.

Player pahnih hi Real Madrid tana khel ve ve an ni a, La Liga leh Champions League-ah an club hi champion nomawi an chawipui - season duhawm tak an hmang ve ve bawk a, tuin nge Ballon d'Or dawng zawk ang, tiin an inzawt.

A chhanna awlsam ber chu Euro leh Copa America-a che ṭha zawk zawkin tih a ni a, mahse, player pahnih hian khawmualpui inelnaah ram tan beisei an phak lo ve ve a, kawng zau taka hawnin a awm phah.

Kuminah Euro awm kher lo se chu Bellingham-a dawn hi a awm viau a, Vinicius pawh a awm. Mahse, khawmualpui inelna pahnih khelh a ni miau a, he inelnaa player che ṭhate sawi lan loh a remchang lo. September 4-ah Ballon d'Or dawng thei tur nominee puan a ni ang a, October 28-ah sem a ni ang.

Vinicius Jr (Real Madrid, Brazil)

Season hman zawh takah ram leh club tan match 49 khelin goal 26 a khung a, assist vawi 11 a nei. Real chu La Liga, Champions League leh Spanish Super Cup-ah a champion pui a, kum 24 mi forward hi Champions League Player of the Season atan thlan a ni bawk.

Copa America-ah inlan zuiin, champion ngat se, a tan Ballon d'Or a chiang, kan ti ngam hial ang. Mahse, quarterfinal-ah an zinkawng a tawp a, Uruguay chu penalty-ah an ngam lo - he inkhelah hian hrem vangin Vinicius a inlan thei lo a, Kaka (2007) hnua Brazilian zinga Ballon d'Or dawng leh hmasa ber nihna chance a thlauh thla ang hiala ngaih a ni.

Rodri (Manchester City, Spain)

Pep Guardiola tan Manchester City-ah player pawimawh a ni a, Spain tan an innghahna a ni. City tan Premier League, UEFA Super Cup leh Club World Cup nomawi a chawi a, Spain tana Euro nomawi a chawi meuh chuan a tira lam rik lutuk loh midfielder hi Ballon d'Or dawng turin a hming a ri ring ta hle.

Season hman zawh takah club leh ram tan match 63 ngawt a khel a, goal 12 khungin assist vawi 14 a nei - Euro-ah Player of the Tournament atan thlan a ni a, Ballon d'Or-in a zui a nih chuan City player zinga Etihad Stadium cham lai Ballon d'Or dawng hmasa ber a ni ang.

Jude Bellingham (Real Madrid, England)

Kum 21 mi lek ni chungin Real Madrid a pan a, tam takin pressure zo lo tura an ngaih laiin La Liga Player of the Season a ni a, Champions League Young Player of the Season a ni bawk - inelna pahnihah hian nomawi a chawi a, Spanish Super Cup chu sawi tel tur a nei bawk.

English midfielder hian season hman zawh takah match 54 khelin goal 27 ngawt a khung a, assist vawi 16 a nei. Euro-ah champion ngat se, kum 2001-a Michael Owen hnua English mi Ballon d'Or dawng thei nihna chance a nei - tunah pawh a chance bo tawh anga sawi a rem lo a, mahse, tlem chuan a tlahniam ta deuh.

Dani Carvajal (Real Madrid, Spain)

Real tan La Liga, Champions League leh Spanish Super Cup nomawi a chawi a, duhtawk ta mai lo chuan Euro-ah Spain a champion pui zui - kum khata Euro leh CL nomawi chawi thei player 12 zingah a hming a ziak kai a, a theuneu lo hle.

Kum 32 mi right back hian ram leh club tan match 54 khelin goal sarih a khung a, assist vawi riat a nei. Champions League final-ah Borussia Dortmund lakah goal khungin, Euro final-ah a khung leh bawk a, fullback zinga Ballon d'Or dawng hmasa ber a ni lo ang tih a sawi theih loh.

Lamine Yamal (Barcelona, Spain)

Kum 16 mi lek ni chungin Euro a khel a, kum 17 mi ni chungin champion nomawi a chawi. Barcelona tan champion nomawi chawi lo mah se, kum 16 mi lek ni chunga club tan match 50-a goal sarih leh assist vawi sarih nei thei a nihna ringawt pawh hi uanpui tham a ni. Euro 2024-ah Spain tan player pawimawh a ni a, vawi li assist neiin, Euro tournament khata assist ngah ber record a nih rual a, nomawi a chawi.

Euro-a inlan thei naupang ber, goal khung thei naupang ber, champion naupang berte a ni vek a, France laka semifinal-a a goal khung chu hriat reng a ni tawh ang. Young Player of the Tournament atan thlan a ni a, Ballon d'Or a dawng a nih chuan kum 1997-a kum 21 lek ni chunga he award dawngtu, Brazilian legend Ronaldo khumin, Ballon d'Or dawng thei naupang ber a ni ang.

Lionel Messi (Inter Miami, Argentina)

Kum 37 mi ni tawh mah se, Lionel Messi hming lam a bang thei lo. Ram leh club tan a che ropui zel a, Copa America-ah an champion leh tak avangin Ballon d'Or dawng thei zingah Argentine forward hi lam rik a ni.

MLS lama Inter Miami tana khel Messi hian US club tan Ballon d'Or dawng tura an hun en bik chhungah nomawi chawi a nei lo a, a tan erawh Ballon d'Or hi thil thar a ni lo - vawi riat a dawng tawh! Ram leh club tan match 39 khela goal 28 khungin assist vawi 17 a nei a, Copa America semifinal-ah goal khungin, final-ah hliam vanga lakchhuah a ngai thung.