Real-ah Modric a la cham dawn

Kum 38 mi Luka Modric chuan Real Madrid a chhuahsan tawh mai rin a nih laiin La Liga champion tana khel chhunzawm zel turin thutlukna a siam a, kum khat dang Santiago Bernabeu-a cham turin contract thar a ziak.

Modric hian kum 2012 khan Tottenham Hotspur aṭangin Real hi a zawm a, nomawi 26 chawipui tawhin, heng zingah hian Champions League paruk leh La Liga pali a tel - a record hi a ropui rem rem hle.

Kum 2018-a Ballon d'Or dawngtu Modric hian Real tan match 534 khelin goal 39 a khungsak tawh a, assist vawi 86 a nei bawk. Season hman zawh takah khan match 46 khelin goal hnih a khung a, assist vawi riat a nei.

Modric hi season hman zawh takah pawh Real tan la inlan hnem tak angin lang mah se, match 23-ah chauh bul a ṭan a, hei vang hian a contract zawh rualin, tun nipuiah chuan chhuak mai tura beisei a ni.

Mahse, Croatian player ropui ber ang hiala tam takin an ngaih hian Bernabeu a chhuahsan phal lo a, Carlo Ancelotti hnuaiah a khelh chhunzawm dawn. Real hian an captain Nacho Fernandez a chhuah avangin Modric hi Captain atan an ruat zui bawk.

Nipui transfer-ah Real-in player la lut tam rih lo mah se, an thawm erawh a na hle. Paris St-Germain aṭangin Kylian Mbappe an la lut tawh a, July 16 khan tlangzarh a ni.

Hetihlai hian Brazilian rawlthar beiseiawm Endrick chu Los Blancos hian Palmeiras aṭangin an la bawk a, transfer titam lo mah se, an tih tawh chin ringawt pawh fans tan chuan lawmna tham a tling.