United defender thar tur Yoro

Manchester United chuan Lille central defender Leny Yoro an la lut hnai a, a man atan euro maktaduai 62 thehchhuah an rem ti - Yoro hi Manchester-ah medical nei turin a awm tawh a, he thuziak i chhiar meuh chuan an in la lut fel tawh hial mai thei.

Kum 18 mi defender hi Real Madrid nen pawh sawizawm a ni a, mahse, Real hi Red Devils sum thehchhuah ang zat an theh chhuak phal lo nia sawi a ni. Kum 16 mi lek nia Lille tana a match hmasa ber kheltu hian season hman zawh takah khan league match 32 khelin goal hnih a khung.

United hi defender Raphael Varane chuan a chhuahsan a, nakkuma contract hmang zo tur Victor Lindelof hma hun a chiang lo a, Harry Maguire dinhmun a sawi theih loh bawk. Hetiang karah hian Red Devils hian Everton defender Jarrad Branthwaite pawh an dawr tawh a, mahse, Merseyside club hian £75mtd an beisei avangin United dawrna hi vawi hnih an hnar tawh.

Erik ten Hag-a team hian Bayern Munich chu Dutch defender Matthijs de Ligt chungchangah an dawr bawk a, Yoro an inrempui takah chuan defender pahnih an la dawr zinga pakhat chauh an la dawn niin an sawi.

United hian Bologna forward Joshua Zirkzee chu £36.5mtd-in an la lut tawh a, tun nipuia an player lei hmasak ber a ni. Hetihlai hian Mason Greenwood a chhuak hnai a, Willy Kambwala chuan £9mtd-in Villarreal a zawm tawh bawk.