Saudi lamah Auba a pem dawn

Arsenal striker hlui Pierre-Emerick Aubameyang chuan Marseille mangṭhain, Saudi Arabia lam a pan dawn a, Saudi Pro League club Al Qadsiah a zawm dawn.

Auba hian season hmasa kha Marseille tana khelin, season a hmang ṭha hle. French club tan inelna hrang hrangah match 51 khela goal 30 khungin, assist vawi 11 a nei a, tunah erawh sum tamna lam hawiin a puanthuah a tel ve ta.

Kum 35 mi Aubameyang hian AC Milan aṭanga zinkawng zawh ṭanin, Dijon, Lille, AS Monaco, Saint-Etienne leh Borussia Dortmund tan pawh a lo khel tawh a, Arsenal-a hming a chher hnuin Barcelona leh Chelsea tan a khel tawh bawk.

Aubameyang hian, "Marseille ka lawm e, ka tan bung thar kai a hun leh ta," tiin French club hi a thlah diam tawh a, Al Qadsiah-ah hian kar khatah £160,000 hlawhin, kum hnih atan contract a ziak dawn niin an sawi.

Sevilla leh Marseille coach hlui Míchel-a enkawl Al Qadsiah hian tun thlatir khan Real captain Nacho Fernandez chu kum hnih atan an lo la lut tawh bawk.