Postecoglou-a'n England lam a hawi lo

Tottenham Hotspur manager Ange Postecoglou chuan England nena sawizawm a nih chungchang chu a hriat loh thu a sawi a, Gareth Southgate-a kalsan tak England enkawl chungchang ni loin, Spurs chauh a ngaihtuah thu a sawi tel bawk.

Kum 2016-a England coach tura lakluh Southgate hian December thleng Three Lions-ah contract nei mah se, ban a thlang a, a hmun ruak luah tur an zawng mek - tun hnaiah Postecoglou hming lam rik a ni.

Mahse, kum 58 mi Postecoglou chuan, "England nena sawizawm ka nih hi engmah ka lo hre ve lo a, kei chuan kan inkhel tur chiah ka lo ngaihtuah," a ti a, London club hi pre-season tour neiin a zinchhuahpui mek.

Spurs hian Nilaini zan khan Scottish Premiership club Hearts chu 5-1 in an sawp a, Brennan Johnson, Will Lankshear, Mikey Moore, Djed Spence leh Lewis Neilson ten goal khat ṭheuh an khung a, Hearts tana Lawrence Shankland goal khungin awmzia a nei phak lo.

He inkhelah hian Spurs tan player chhuanvawr Son Heung-min pawh a inlan a, Inrinni zan hian Queens Park Rangers nen friendly match khel zuiin, kar leh lamah chuan khawchhak lamah tour an neih chhunzawm ang.

Postecoglou chuan sawi zawmin, "Tottenham manager ka ni a, chu chu ka dinna a ni," a ti a, England enkawl tum angin a awm lo. Mahse, Australia national team pawh lo enkawl tawh coach hian international football-a ram langsar enkawl hi a hreh lo mai thei.

Celtic boss hlui hian season hmasa ṭan dawn khan Spurs hi a zawm a, season bul ṭan ṭhatpui viau mah se, table-ah pangana niin season an khar. Champions League an khel phak lo chungin Postecoglou hian attacking football hmuhnawm tak a chhawp ṭhin avangin fak erawh a hlawh hle.

Hetihlai hian Newcastle United manager Eddie Howe hming pawh a ri ring viau a, mahse, Magpies chief executive Darren Eales chuan Football Association dawrna an pawm loh tur thu a sawi lawk tawh.