South Africa tan Steyn a lo kir

Cricket khawvela ram langsar ber pawl South Africa fast bowler Dale Steyn chuan international cricket a khel leh dawn hnai tawh a, England hmachhawn tur Twenty20 squad-ah March 2019 hnua a vawi khat nan telh a ni. 

Kum 36 mi Steyn hian nikum Cricket World Cup pawh kha dar hliam vangin a khel thei lo a, cricket khawvelah hun rei zawk hman a duh avangin August 2019 khan test cricket chu a mangṭha bawk. 

Steyn hian cricket khawvelah a theihna pholan leh ngei tumin Big Bash League lamah Melbourne Stars tan a khel bawk a, a beisei ang ngeiin international cricket-ah a rawn kir leh dawn ta. 

Hetihlai hian January-a ODI captain atana ruat wicketkeeper Quinton de Kock chu captain a ni ang a, T20 captain ni sa Faf du Plessis chu chawlh hahdamna hun pek a ni thung. 

Fast bowler Kagiso Rabada pawh chawlh hahdamtir a ni a, international cricket a chawlhsan hnua kumin kum tawp lama T20 World Cup khel tura South Africa thuneitute nena inbe mek anga sawi batsman AB de Villiers pawh koh a ni lo. 

Proteas tan batsman Pite van Biljon leh seamer Sisanda Magala te chu a vawi khat nan koh an ni bawk. T20 match thum khelh tur hi zanin dar 9:30-ah an khel ṭan ang a, February 16 zanah match thumna an khel ang. 

England leh South Africa hi ODI series khel zo hlim an ni a, match thum an khelhah 1-1 in an inhnehtawk - match khat hi ruah sur vangin khelh a ni lo.