UEFA-in single-game format a kalpui zel dawn?

European football-a thuneitu sang ber UEFA president Aleksander Ceferin chuan Champions League-a home & away-a inkhelh ngai lo chu ṭhaa a hriat thu a sawi a, UEFA-in hman chhunzawm zel chi a nih leh nih loh a ngaihtuah dawn!

UEFA hian Covid-19 vangin Champions League leh Europa League home & away-a khelh ṭhin chu quarterfinal aṭangin hmun khatah single leg-in an khelhtir a, an beisei aiin a hlawhtling niin a lang. 

Ceferin chuan, "A nihna takah chuan duhthlan tur dang nei chuang lo chunga ti kha kan ni ber a, hman chhunzawm zel chi a nih leh nih loh hi kan ngaihtuah dawn a ni. Match khat chauh an khelh kha chuan inkhel a hmuhnawm zawk niin a lang. 

"Team pakhatin goal an khung tawh chuan an khingpui tan innghahna tur second leg a awm tawh lo a, lo theih loha goal khung tumin an nawr a ngai ṭhin a ni," a ti. UEFA President chuan game hmuhnawmna piahlamah inkhel pe chhuaktu broadcaster lam ngaihtuah tel a ṭul thu sawiin, "Single leg a nih chuan match a tlem dawn a, hei hi broadcaster lam buaina a ni ve thei. 

"Engpawh nise, kan hun tawn duhawm lo tak hi a liam hunah tha tharin heng zawng zawng hi kan la ngaihtuah leh ang," a ti - season tharah tun season Champions League ang tho hi kan hmu leh a nih pawhin mak ti suh.