Man Utd thawm a ring; Zirkzee zawhah Yoro

Sir Jim Ratcliffe leh a hoten Manchester United-a neitu nihna an neih hnuah English club-in player lakluh tur hun rei tak an veh ta lo. Erik Ten Hag-a hoten hian Netherlands striker Joshua Zirkzee an lakluh hnuah French defender Leny Yoro chu Lille aṭangin euro maktaduai 62 (£52.18mtd) in an la lut a, a chet ṭhat dan a zirin a man hi euro maktaduai riatin (£6.73mtd) a la pung thei ang.

Kum 18 mi Yoro hi centre back a ni a, kum nga daih contract ziakin kum khat dang pawhsei theih dan a awm bawk. Yoro hian kum 16 mi lek a nihin Lille tan a khel ṭan a, Real Madrid leh Paris St-Germain te nen sawizawm an nih bakah Liverpool pawhin lak tumin an hel bawk.

Season liam ta khan Yoro hian Ligue 1-ah match 32 a khel a, goal hnih khungin Lille hi palina an ni a, Ligue 1 team of the season-ah a tel. Yoro chuan, "Kum naupang tak ni chunga club lian leh tum sang tak nei Manchester United tana ka inziak lut thei hi ka tan chuan chawimawina a ni.

"Club nena kan inbiak hmasak ber aṭangin an tum fel fai takin min hrilh a, hma ka sawn theih dan tur thlengin ruahmanna an siam. Kei leh ka chhungte min duat em em bawk. Player naupang enkawl kawngah Man United hi an hming ṭha bawk a, club thar tana khelh hun ka nghakhlel tawh hle," tiin a sawi.

Man United hian tun nipuiah Zirkzee (£36.5mtd) leh Yoro te an la lut tawh a, player pahnih lek aṭanga an sum sen hi £88.68mtd a tling der tawh.

Season liam ta khan Man United hian goal 58 an chhuah a, hei vang hian tun season nipui bazarah tlarhnung an ngai pawimawh hle. Yoro an lakluh hma hian Jarrad Branthwaite chungchangah Everton an dawr a, Toffees-in player manah £75mtd chuang an chhiar avangin inremna an nei thei lo.

Chutihrualin Man United hian Yoro la lut tawh mah se Branthwaite bakah Bayern Munich Dutch defender Matthijs de Ligt te an la ngaihven niin a sawi a awm bawk.

Season liam ta tawp rualin Raphael Varane a chhuak a; defence laiah Lisandro Martínez, Harry Maguire leh Victor Lindelöf te an la awm. Defender hi awmsa hi an inthianfai ṭhen a nih loh chuan defender lai lakluh a harsa tawh ang.