India coach turin Manolo, Habas & Park hming a ri ring

All India Football Federation chuan Igor Stimac nen an inṭhen hnuin India coach tur an dap chhunzawm zel a, Blue Tigers enkawl duha dil coach 291 aṭangin thlitfim hna an thawk ṭan mek.

India coach ni tura dil zingah mi 100 chu UEFA Pro License nei niin, AFC Pro License nei mi 20 an awm a, pathum chu CONMEBOL lam aṭanga license nei an ni - India coach nih duh hi an hrawl hlawm hle.

Ivory Coast leh Japan coach hlui Philippe Troussier, Manchester City coach hlui Mark Hughes, Newcastle United boss hlui Alan Pardew, Argentina coach hlui José Pékerman leh Japanese legend Keisuke Honda te chu India coach nih dil zingah an tel nia sawi a ni.

AIFF president Kalyan Chaubey chuan July thla tawp lamah India coach hi tihchian a nih tur thu a lo sawi tawh a, coach langsar tak tak karah AIFF hian Indian football hrechiang an duh avangin ISL lama hming chher Manolo Marquez leh Antonio Lopez Habas hming a langsar a, South Korean coach Park Hang-seo a ri tel bawk.

Manolo & Habas

AIFF hian coach 291 aṭang hian India coach ni tura an duh deuhte chu email hmangin an dawr phawt a, coach-te hi India coach nih an la duh reng em? Thla tina an hlawh beisei zat hniam ber, thlan an niha India an enkawl ṭan theih hun tur leh mamawh an neih dangte sawi turin an ngen.

Heng coach-te hian chhanna an thawn let hunah AIFF hian a thlifim leh ang a, interview an buatsaih leh ang. FC Goa coach Manolo leh Mohun Bagan boss hlui Habas te chu interview tur chiang nia sawi a ni a, Park hi an be pawp bawk.

Kum 55 mi Manolo hian La Liga-ah Las Palmas chu match ruk a lo kaihruai tawh tih loh chu, top level-ah tawnhriat a nei mang lo. Mahse, 2021-22 season khan Hyderabad FC chu Indian Super League-ah a champion pui a, June 2023 aṭang khan FC Goa a enkawl ṭan.

Kum 67 mi Habas hian Valencia leh Celta Vigo pawh a lo enkawl tawh a, Bolivia chu Copa America final hial a hruai thleng tawh. Atlético de Kolkata chu 2014 leh 2020 khan ISL-ah nomawi a chawipui a, season hman zawh takah khan Mohun Bagan SG chu league winners' shield a lakpui.

Tu nge Park?

Indian football-a coach langsar pahnih karah Park hming a ri ring. Kum 66 mi coach hian South Korean football-ah chuan a hming a chher tawh viau a, Asian football-a hriat a hlawhna tak erawh Vietnam a enkawl chu a ni.

Asian Games 2022-a South Korea U23 tana bronze medal hlawh chhuaktu coach hian kum 2018 khan AFC U23 Championship-ah Vietnam chu final a hruai thleng a, AFC inelnaa Vietnam-in final an luh hmasak ber a ni - Asian Games 2018-ah semifinal a hruai thleng bawk a, kum 56 hnua Vietnam thlen san ber a tawnpui.

Vietnam hi ASEAN Championship-ah vawi khat champion puiin, U23 team chu SEA Games-ah vawi hnih gold a lakpui a, Asian Cup 2019-ah quarterfinal a hruai thleng a, World Cup 2022 qualifier-ah khan third round a hruai thleng bawk - football ram ṭha pawh ni lo tana a sulhnu hi a hrawl hle.

Hetihlai hian Park hi Cambodia chuan an coach ni turin an dawr mek bawk a, Vietnam-ah khan thla khatah $50,000 (Rs. 41,82,920) a hlawh a, hei hi Blue Tigers tan a sang hret mai thei. Igor Stimac khan thla khatah nuai 22 vel a hlawh a, an ban avanga zângnadawmna pek a ngaih bawk avangin AIFF hian sum an nei lutuk lo nia sawi a ni.