Man City-in winger Savinho an la lut

Manchester City chuan French club Troyes aṭangin Savinho chu euro maktaduai 40 (£30.8m) in an la lut a, Brazil winger hian kum 2029 thleng daih contract a ziak.

Kum 20 mi Savinho hi season liam ta khan loan hmangin Girona-ah a khel a, La Liga-a pathumna an nih theihna kawngah a ṭangkai. Chutihrualin hriat tel atana ṭha erawh Man City, Girona leh Troyes te hi City Football Group hnuaia mi vek an ni.

Savinho chuan, "Tun dinhmunah City hi khawvela team ṭha ber an ni a, khawvel manager piang tawha ropui ber zinga mi Pep Guardiola-a'n a enkawl bawk. An club dinhmun ka hriat chian avangin hetiang hun ṭha hi ka tan bawhpelh chi a ni lo.

"Brazilian ka ni a, ball changtu leh nawrtu zawka ṭan ka duh. Nuam tia football khelh ka duh a, mal leh mala defender hmachhawn te, ṭhiante goal khung tur siamsak leh goal khungte hi nuam ka ti. Ka duh ber chu inkhel entute tana hmuhnawm chhawp chhuah a ni," tiin a sawi.

Brazilian winger Savinho hian Brazilian club Atletico Mineiro aṭangin bul a ṭan a, kum 2022 khan French club Troyes a zawm. Ligue 2 club tan hian Savinho hi a khel miah lo a, loan hmangin PSV leh Girona-ah a kal. Season liam ta khan Girona tan match 37 khelin goal kua a khung a, hming a chher hle.

City director of football Txiki Begiristain chuan, "Man City tan tun season leh nakin zelah hna pawimawh tak chelh tur a nei. A theihna ka ringtawk a, a la naupan avangin hma a sawn zel ang. Mi tu pawhin Pep hi naupang theihna hai chhuak turin a ṭha ber tih an hria a, chutihrualin Savinho hian theihna sang tak a nei tawh hrim hrim a ni," tiin a sawi.

Savinho hi mual sirah ding leh vei lamah a khel a thei ve ve a, mual laiah a khel thei bawk. A khelh nuam tihna ber erawh mual dinglamah a ni. City player hlui Riyad Mahrez nen an khelh dan a inang tiin an sawi ṭhin a, English club tan hian Mahrez-a jersey number hak ṭhin no. 26 a ha ang.