Mason Greenwood-a'n Marseille a pan

Marseille-in Manchester United aṭangin Mason Greenwood chu euro maktaduai 31.6 (£26.6m) in an la lut a, kum 2029 thleng daih contract an ziahpui.

Kum 22 mi Greenwood hi Man United academy chhuak a ni a, khelmual pawnah buaina a neih avangin January 2022 hnuah Premier League club tan a khel leh tawh lo.

Season liam ta khan Greenwood hian loan hmangin Getafe a zawm a, league match 33 khelin goal riat a khung. Inelna hrang hrangah match 36 khelin goal 10 a khung bawk.

Greenwood hian a bialnu Harriet Robinson a khawih avangin thubuai a nei a, amaherawhchu English forward hi Robinson nen hian fa neiin an cheng dun. February 2023 khan thubuai pawh tihtawp a ni.

Mahse, Greenwood hi sawiseltu an tam avangin Man United pawhin mamawh mah se chelh ngam loin loan hmangin an chhuahtir. French club-in an lakluh pawh hian Marseille mayor chuan a sawisel hial.

Man United chuan Greenwood chu website kaltlangin duhsakna an hlan a, Marseille hian an hralh a nih chuan sum ṭhahnem tak an chan theih dan a la awm. French club hian Sunderland nen August 3, Inrinni hian Bradford-ah friendly match an khel dawn. Bradford hi Greenwood-a pianna khua a ni.