Veikhawr Lamine Yamal

Lamine Yama hi tlarhma lamah chuan a chhawr kual thei, a lai leh sir bakah attacking midfielder atan a hman theih - veikhawr a ni a, ball thiam leh hmuhnawm bik tak a nih avangin Lionel Messi nen pawh an khaikhin ṭhin.

Yamal hian season thar aṭangin Barcelona jersey number 19 a ha dawn, hei hi Messi-a'n a hun hmasa lama a lo hak tawh ṭhin ngei mai kha a ni a, player ropui bik sulhnu zui turin a tan kawng a inhawng zau hle tihna a ni.

Mual sir lama a chet tlat tam takah chuan Yamal hian Neymar khelh dan phung tam tak a entawn niin a sawi a, Brazilian forward Neymar hi a vanglai chuan khawvela ball thunun leh chhaih kual vel thiam berte zinga mi a ni, a entawn hi a mak hran lo.

Euro 2024 en ṭhinte chuan an hria, final inkhel boruak sang leh hmuhnawm tak maia English player ho ten ven harsa an tih chu Yamal-a ke veilam bawk kha a ni a, goal khung chiah lo mah se Three Lions tlarhnung chhaih buaitu langsar a ni.

Nico Williams-a'n goal a khung dawna Yamal hna thawh kha hmuh hmaih theih a ni lo, mual sirah England player ten an hual a, mahse a chhak lama a ṭhianpa rawn tlan tana pet nuam tawk tur chiahin a siamsak daih a, goal an neih theih phah.

Euro an champion theih nan Yamal hian a thawhhlawk, semifinal-a goal ropui a khung bakah inelna neih chhungin a ṭhiante goal khung tur vawi li a siamsak bawk a, a phu ang takin Euro nomawi bakah Young Player of the Tournament nihna nei chungin Spain lamah a haw thei ta a ni.