France ngamtu Yamal

European champion nih tumin football thiam ram an inel suau suau a, semifinal boruak phei chu sang tawh tak a ni. Spain leh France nen final luh an inchuh tur chu khawvel ngaihven a ni a, a boruak pawh a sang hle a nih kha.

Inkhelh hmain chanchinbu mite hmaah coach leh player an inlan ṭhin. France midfielder Adrien Rabiot chuan, "Inelna lian semifinal boruak chu Lamine Yamal tan a la harsa hle ang tih ka ring.

"Nuam ti taka a inkhelh leh inkhelh loh chu kan kutah a awm, a nihna takah chuan final thleng tur chuan tournament khelh laia a khelh ṭhin dan pangngai aia ṭha zawkin a khelh a ngai ang," a ti zauh a nih kha.

Spain leh France chu khelmual chhungah an intawng ta ngei mai - France lamin Randal Kolo Muani hmangin goal an nei hmasa, inkhelh hma boruak nen Rabiot khan sawi fuh a inti hman hlein a rinawm.

Mahse, mual sir lama awm Yamal chu zuam ngawt chi a lo - box pawn hla deuh takah ball a chang a, hmun hlauhawm ni pawhin a lang lo, mahse rang taka insiamremin goal mawi a khung, a hma a ding Rabiot chuan anmahni lama goal lut lai a hmu chiang hle.

France laka Yamal goal khung hi UEFA chuan Goal of the Tournament atan an thlang zui a, hnehna an chan hnuah Yamal chuan, "Ṭawng a hun" tiin Rabiot a chhanglet ve tan chiah a, Euro 2024 boruak ti nuamtu zinga mi a ni chiang hle.