LZ Juice MPL11 : CFC an vul; AFC an ṭha; SYS an tlo; Police an tlahniam

Mizoram chhunga football inelna sang ber LZ Juice MPL11 chu round 3 khelh zawh a ni tawh a, rin lawk ang ngeiin Chanmari FC leh Aizawl FC te che ṭha mah se rin loh dana thil thleng pawh a awm. Naupang ṭha rual awm khawmna SYS FC chu puitling zingah an kawlhrawng a, champion lai Mizoram Police an tla hniam hlek niin a lang bawk.

MPL11 match 12 khelh tawh aṭangin goal 44 a lut tawh a, star thar an piang dawn. Serchhip tlangval Felix Lalruatsanga'n match thum lek aṭangin goal nga a khung tawh a, season liam taa top scorer Lalrinzuala goal khung zat tluk pha turin goal thum chauh a mamawh tawh. Rinzuala pawh hi Serchhip tlangval tho a ni.

Sanga 'Chanmari'

Chanmari FC-in champion nomawi chawi an tum bakah I League 3 an khelh dawn avangin MPL-a record nei ṭha ber Lalsangzuala Hmar an la lut a, Sanga hnuaiah kawng dik an zawh. Match thum khelh tawh aṭangin Chanmari an la chak vek a, goal nga khung tawhin goal an la chhuah lo.

Chanmari hian match hmasa bera FC Bethlehem an hmachhawn ṭumin an striker chhuanvawr Khawpuimawia (Mapuia) hliam vangin hma takah an la chhuak a, Kelkang striker hi a chawlh rih a ṭul dawn. Mapuia awm lohna Chanmariin goal khung an harsat lo. MS Dawngliana leh Lalnunzama ten mawhphurhna an la thei tih an lantir a, PC Rosangzuala pawh tlarhmaah a rintlak viau.

Sanga hote inkhel belhchian dawlna erawh goalkeeper Zothanmawia emaw RS Lallawmzuala emaw pawh hmang se, goal an chhuah lo. Lalrinchhana Tochhawng hoa inrem Chanmari tlarhnung a phui ṭha a, Rinchhana kawppui Lalhmangaihsanga pawhin hma a sawn zel bawk.

AFC an ṭha

FIFA-in Aizawl FC chunga hremna a lekkawh chu a hlip ta a, player tharte I League club tan an inlan ṭan. Aizawl FC hi an squad a chhah sawt a, mual sir aṭanga nawr tur pawhin Augustine Lalrochana leh Lalbiakdika te an awm bakah Malsawmzuala Tlangte leh Laltlanzova te an neih belh.

Sawma Tlangte hian AFC tana match a khelh hmasak berah goal a khung nghal a, Laltlanzova (Zozoa) erawhin khelhna hun a la nei lo. I League club squad a chhah a, position tinah player ṭha an kawl.

Chutihrualin Aizawl FC hian player nei ṭha mah se an ṭhat dan tur ber a la chiang lo. Ramhlun Athletic an hmachhawn ṭum pawhin inkhel thunun mah se chak turin vanneihna an mamawh.

SYS an tlo

MPL11 qualifier-ah SYS FC an champion thei lo a, MPL khel turin playoff-ah Project Veng FC an hneh. SYS hi tun ṭum inelnaah hian relegate thei tura ngaih an ni a, mahse match thum khelhlah chak loh an la nei lo.

Coach Lalmuankima hote hian point sarih hmu tawhin Aizawl FC nen an point hmuh zat a inang hial. SYS hi vanneih vanga point sarih hmu an ni lo a, vannei se chuan point kua an hmu zawk hial ang.

Police an tlahniam

Champion lai Mizoram Police-in Chanmari FC an hneh loh zawhah SYS FC an hneh lo a, match hmasa bera Ramhlun Athletic FC an hneh bak chak an la nei lo.

Police-in Santosh Trophy hnuhnung ber khel Mizoram team-ah player an thawh hnem a; goalkeeper F. Lalmuanawma, defender Lalhmunmawia leh Lalrinzuala Khiangte; midfielder H. Lalbiakthanga leh R. Malsawmtluanga leh striker Malsawmfela te chu player pawimawh an ni vek.

Mahse, Police player ṭhate hi an vanglai a pel tawh em, tih theih turin an khel a, tun hnaiah 'recruitment' a awm loh avangin squad tichhah turin civil player an la tel. Chutihrualin Police hian civil player lakna tur sum an neih bik loh avangin player ṭha ber an la thei lo. MPL10 champion Police hi MPL11-ah semifinal lut lo thei an ni.