Rabiot-a'n Juve a chhuahsan

Juventus chuan an midfielder Adrien Rabiot a chhuah thu an puang a, France international hian Serie A club-ah hian a contract a hmang zo a ni.

Kum 29 mi Rabiot hian kum 2019 khan Paris St-Germain aṭangin Juve hi a zawm a, inelna hrang hrangah match 212 khela goal 22 khungin, assist vawi 15 a nei a, Serie A (1), Coppa Italia (2) leh Supercoppa Italiana (1) ah te champion nomawi a chawipui.

Juventus technical director Cristiano Giuntoli chuan an manager thar Thiago Motta tlangzarhnaah Rabiot chhuah thu hi sawiin, "Rabiot chungah pawh lawmthu ka sawi - a contract a hmang zo ta a, a career leh thil dangah duhsakna sang ber kan hlan," a ti.

Euro khelh zawh taka France player pawimawh ni phak Rabiot hi Juve chuan chelh duh mah se, kum hnih atana contract thar an zawrh chu a hnar nia sawi a ni a, Manchester United, Real Madrid leh AC Milan ten an thlithlai nghal niin khawthlang media-te chuan an tarlang.