Auba-a'n Saudi a pan

Arsenal captain hlui Pierre-Emerick Aubameyang chuan Saudi Pro League club Al Qadsiah a zawm ta a, kum hnih chhung atan contract a ziak.

Kum 35 mi Auba hian season hman zawh tak kha Marseille-ah khelin, French club tan inelna hrang hrangah match 51 khela goal 30 khungin, assist vawi 11 a nei thei - a record hi a chhe lo.

Aubameyang hian AC Milan aṭanga zinkawng zawh ṭanin, Dijon, Lille, AS Monaco, Saint-Etienne leh Borussia Dortmund tan pawh a lo khel tawh a, German club-ah hming a chher hnuin, January 2018 khan Arsenal a pan.

Arsenal-ah hian captain hial ni mah se, coach Mikel Arteta nen an inhmu thiam lo a, February 2022 khan Barcelona a zawm. Catalan club tan match 23-ah goal 13 a khung a, thla ruk lek a khelh hnuah Chelsea a zawm.

Blues tan match 21 khela goal thum chiah khungin beisei a phak lo a, Marseille a pan. French club-ah a intuaithar leh hnuin Saudi lam a hawi ta - kum khatah euro maktaduai 20 a hlawh dawn niin an sawi.

Sevilla leh Marseille coach hlui Míchel-a enkawl Al Qadsiah hian season hmasa kha Saudi First Division League-ah khelin, Saudi Pro League an inpetkai a, Auba hma hian Real Madrid captain Nacho Fernandez chu kum hnih atan an lo la lut tawh bawk.