Khaw hmuh fiah loh chang ka nei - Verstappen

Max Verstappen chuan 2021 Formula 1 season an hman liam tak chungchang a sawi chhuak a, a elpui Lewis Hamilton nen an intihpalh hnuah khaw hmu fiah mumal lo chunga intlansiak a nei tih a sawi.

British Grand Prix 2021 an tlan ṭum khan Hamilton a car ke hma lam leh Verstappen-a car a intai palh a, he thil thleng avang hian tlankawng sirah Red Bull driver hi tawlh chhuakin a sira bang chu na takin a su.

Dutch tlangval Verstappen chuan, "Intlansiak mi kan ni a, hliam leh intihpalh chang chu a awm thei a, vanduaina pawh tawh palh theih a ni, thil thleng zawng zawng kha chipchiar taka sawi vek erawh a ṭul lem lo.

Mahse, ka sawi theih pakhat chu, khaw hmuh kawngah harsatna neih chang ka nei, hmu fiah vak lo a inelna hmachhawn pawh ka nei, a season dawt lehah erawh chutiang harsatna chu a awm tawh lo thung," tiin a sawi.

Car intlansiakna sang berah hian season laihawl an hmang mek, tun season intlansiak 24 awm tur zinga 12 tlan tawh niin Verstappen hian point 84 ngawtin hma a hruai fal mek, a vawi li nana champion turin a dinhmun a ṭha.

July 21, Pathianni zan dar 6:30 hian Hungaroring tlankawngah Hungarian Grand Prix an tlan leh ang.