Anpai val lo kiang ru; Mizo val an lo lang e! AIFF Men's Player of the Year Lallianzuala Chhangte

Indian football roreltu chu Mizo tlangval an ni, ti ila, dawt sawi kan ni lo a, a tak tak a ni - Zirtawpni zan khan All India Football Federation chuan AIFF Award a sem chhuak a, award ngaihhlut hlawh ber dawngtu chu Lallianzuala Chhangte a ni.

Mumbai City forward hi AIFF Men's Player of the Year atan thlan a ni a, East Bengal striker thar David Lalhlansanga chu Promising Men's Player atan thlan a ni bawk - award langsar pahnih chu Mizo tlangval kutah hlan a ni.

Lunglei tlangval Lallianzuala Chhangte chuan, "Pathian malsawmna a ni," tiin Vanglaini hnenah a sawi a, David-a chuan, "Ka beisei phak loh chawimawina a ni," tiin India rama player ṭhangduang bera thlan a ni chu mak a tih thu Vanglaini a hrilh ve bawk.

New Delhi-a award semna inkhawmah hian Women's Player of the Year atan Indumathi Kathiresan chu thlan a ni a, Men's Coach of the Year-ah Aizawl FC coach hlui leh Jamshedpur FC boss ni mek Khalid Jamil chu thlan a ni.

Lalpa, nang vang...

Lallianzuala Chhangte chu a flight cancel a nih avangin award semna inkhawmah hian a tel thei lo a, Mizoram sports minister leh Mizoram Football Association president ni bawk Lalnghinglova Hmar (Tetea Hmar) chuan he award hi a dawnsak.

Lunglei forward Lianzuala chuan, "A hmunah he award hi dawng thei lo mah ila, ka aiawha min dawnsaktu kan Sports Minister chungah lawmthu ka sawi. Ka phu loh chawimawina ka dawng hi ka lawm takzet a, min hruaina, venna leh malsawmna avangin ka Pathian, Lal leh chhandamtu Isua Krista hnenah lawmthu ka sawi a ni.

"Amah vang chauha he dinhmun hi thleng ka ni tih ka inhria. A tir aṭanga min thlawptu ka chhungte chungah ka lawm a, Mumbai City leh national team-a ka ṭhian leh thawhpuite chungah ka lawm bawk - an thlawpna lo chuan he award hi ka dawng thei lo ang," tiin a sawi.

Lianzuala hian season hmasa khan AIFF Player of the Year chawimawina hi a lo dawng tawh a, Mizo zingah Jeje Lalpekhlua chuan kum 2016 khan he award hi a lo dawng tawh bawk.

Sulhnu ropui

Season hman zawh takah khan Lianzuala hian inelna hrang hrangah match 34 khelin goal 11 a khung a, assist vawi sarih a nei bawk. League bikah match match 25 khelin goal 10 a khung a, assist vawi ruk a nei bawk.

Lunglei tlangval hi Indian player zinga ISL season hniha goal 10 khung tling thei hmasa ber a ni a, ISL-ah Mumbai chu a champion pui bawk - Mizo tlangval sulhnu hi thlir ila, he award dawn hi a phu takzet.

Lianzuala chuan, "Season bul ka ṭan dan ka thlir kha chuan, hetiang taka a tawp khar hi chu ka beisei phak lo. Mahse, ṭha takin season ka khar a, ka lawm khawp mai - Pathian remruat leh tlai ngai lo Pathian a nihzia a lo langin ka hria," tiin Vanglaini a hrilh.

June thla khan FIFA World Cup Qualifier-ah Qatar hmachhawnin Lianzuala hian goal a khung bawk a, DSK Shivajians, NorthEast United, Delhi Dynamos leh Chennaiyin player hlui hian ram tan match 38 khelin goal riat a khung tawh.

Mi danglam bik

AIFF Men's Player of the Year ni tur chuan season khat ṭha taka hman a ngai a, he award vawi khat lek dawng thei nih pawh hi a awlsam lo. Kum 1992 khan sem ṭan niin, kum 1998 leh 99-ah sem a ni lo a, vawi 30 semchhuah a ni tawh.

Mi 18-in he award hi dawng tawhin, Sunil Chhetri chuan a dawng hnem fal nalh a, vawi sarih a dawng tawh - IM Vijayan chuan vawi thum dawng tawhin, Jo Paul Ancheri, Bhaichung Bhutia leh Lallianzuala Chhangte ten vawi hnih ṭheuh an dawng.

Indian footballer ropui sawi a nih apiangin Lianzuala hming lam rik a ni ve zel tawh dawn a, a tel lo chuan Indian football chanchin hi a kim tawh lo ang - vawi khat aia tam dawng theite hming khi en la, Indian football sawi nghingtute vek an ni.

Lianzuala chuan, "A zawna dawn tak hi thil harsa tak a ni tih ka hria a, dawn leh ngei chu tum mah ila, a zawn em chu ka beisei ngam lo - ka rin aia hmain ka dawng leh ta a ni," tiin Vanglaini a hrilh, Chhetri tih loha a kum zawna dawng thei hmasa ber a ni.

Mizo lawm teh u!

Hman kum tam liam tawhah khan Zosapthara chuan, "Mizo lawm teh u" min lo titawh a, kan footballer-te zarah chu hla thu chu ṭawm takin kan sa leh thei ta - Mizo lawm teh u!

Lianzuala chuan amah ṭawngṭaipui ṭhintu Mizo mipuite hre rengin, Vanglaini kaltlangin lawmthu a sawi a, Mumbai forward chuan, "Mizo mipui, min ṭawngṭaipui ṭhintu ka nei che u hi lawmthu ka sawi duh a, min lo ṭawngṭaipui zel tur pawhin ka chah nghal duh bawk che u.

"Kei pawh Pathian ropuina leh Mizoram tihmingṭhatu ni turin theihtawp ka chhuah zel ang," a ti a, tawp a la tum lo - Lza hian 2022-23 season-ah khan ISL Golden Ball a lo dawng tawh bawk a, Sunil Chhetri tih loha Indian player zinga he award dawng thei awmchhun a ni.

Lunglei tlangval hi FPAI Indian Player of the Year award chu kuminah hlan a lo ni tawh bawk a, season hman zawh taka Indian football-a award langsar pahnih chu a dawng ve ve tihna a ni - a namai lo hle.