Lza & David vangin Mizo nih a nuam - Sports Minister

Mizoram sports minister Lalnghinglova Hmar (Tetea Hmar) chuan AIFF Award semna hi a hmunah a hmanpui a, chawimawina sang pahnih dawngtu Lallianzuala Chhangte leh David Lalhlansanga te vanga Mizo nih a nawm thu Vanglaini a hrilh.

Mizoram Football Association President ni bawk Tetea Hmar chuan, "Ram pum huapa a ṭha zawnga Mizote min tihmingṭhatu an ni a, award semna hmuna India Sports lam hotu rual bulah pawh Lianzuala leh David-a vangin Mizo nih a nuam. Lawmpuina pawh kan dawng nasa hle," a ti.

Tetea Hmar chuan sawi zawmin, "Mizo ṭhalai dangte tana fuihtu an ni a, naupang zawkte tana entawntlak an ni. An lawmman dawnah ka lawmpui a, an kal zelna turah pawh duhsakna ka hlan a ni," tiin Vanglaini kaltlangin Mizo footballer pahnih a lawmpui.

Mizoram Sports Minister hi MFA President a nih bakah AIFF Executive Committee member a ni a, AIFF League Committee-ah Chairman ni lai a ni bawk.

"Indian football-a lawmman dawn theih sang ber, tam vang emaw, duhsaktu neih vanga dawn ngawt theih pawh ni lo, record leh performance mila sem ṭhin lawmman Mizo tlangvalten an dawng hi a lawmawm ka ti a, he award dawng tura an inpekna leh thawhrimna mawlh hi fak phu chu a ni - hei hi mi tam takin kan hmuh kâ n ṭhin.

Kan Mizo footballer dangte pawhin hei hei chonaah ngai se, infuihthar nan hmang se ka duh hle. An ṭhiante pawhin an tih theih hi an ti ve thei a, an ban phakah a awm ve reng a ni tih hre thar leh se ka ti. Lianzuala leh David-a te thinlung takin ka lawmpui a, duhsakna ka hlan a ni.

- Lalrengpuia, MFA Honorary Secretary