India coach thar Manolo Marquez

All India Football Federation chuan coach atan FC Goa manager Manolo Marquez ruat a nih thu an puang a, Spanish coach hian Blue Tigers hi kum thum chhung atan coach turin an pawm - kum khat chu FC Goa leh India a enkawl phawt ang.

Indian football team enkawl châkin coach langsar tak takin dilna an thehlut a, mahse, AIFF chuan Indian football hrechiangtu lam hawiin, European football top level-a tawnhriat nei tam lo Manolo Marquez a thlang.

Las Palmas coach hlui hian kum 2020 khan Indian football luhchilh ṭanin, Hyderabad FC-ah bul a ṭan a, budget nei tam lo chungin 2021-22 season-ah khan ISL nomawi a chawipui. June 2023 khan FC Goa a enkawl ṭan a, Goan club-ah pawh a che chhe lo.

Kum 55 mi coach chuan, "Indian football team ṭantu mi maktaduai telte tan hlawhtlinna chharsak ngei turin theihtawp ka chhuah ang. FC Goa-in club enkawl chunga Indian football team enkawl min phalsak hi ka lawm a, AIFF chungah pawh hun ṭha min pek avangin ka lawm - football tan hna ropui tak kan thawh kan beisei," a ti.

India coach nih tum hian coach 291-in dilna an thehlut a, hei hi mi 150-ah thlitfim leh niin, heta ṭang hian coach 17 chu inbiakna neihpui an ni. India coach ni tur hian World Cup-a Japan lo kaihruai tawhtu Philippe Troussier, Cameroon boss hlui Winfried Schäfer leh Real Madrid coach hlui Juan Ramon Lopez Caro te chu final list-a lang zingah an tel.

Mahse, AIFF hian coach ban tak Igor Stimac chu zângnadawmna tam tham tak an la pek a ṭul dawn avangin, sum lamah harsatna an nei a, Marquez hi an thlang ta niin an sawi.

Hetihlai hian India captain hlui Bhaichung Bhutia chuan AIFF Executive Committee-in technical committee rawn loa thutlukna an siam chu duh loin, AIFF technical committee aṭanga banna a thehlut.