Man United tan Yoro a khel ṭha nghal

Manchester United-in season thar atana friendly match hmasa bera Rosenborg an hneh loh hnuin July 20, Inrinni khan Rangers an hmachhawn a, 2-0 in an hneh.

United Kingdom-a khelmual lian pangana Murrayfield Stadium-a inkhelah Man United tan Amad Diallo leh Joe Hugill ten goal an khung a, Lille aṭanga an lakluh defender Leny Yoro pawhin bul a ṭan.

Yoro hian minute 45 chhungin khelin vawi 48-ah vawi 44 a pass dik a, vawi 51 ball a khawih. A ball pass zinga vawi thum hi final third a ni a, a tackle zawng zawng a dik vek bawk.

Man United hian French defender Leny Yoro hi Lille aṭangin euro maktaduai 62 (£52.18m) in an lalut a, a chet ṭhat dan a zirin a man hi euro maktaduai riatin (£6.73m) a la pung thei ang.

Inkhelh banah Yoro chuan, "Min ṭantute chungah kan lawm a, Old Trafford-a inkhelh hun ka nghakhlel. Man United tana ka khelh hmasak bera ka chet danah ka lawm a, nuam ka ti takzet," tiin a sawi.

Man United hian senior player zingah Yoro bakah Andre Onana, Jonny Evans, Aaron Wan-Bissaka, Casemiro, Amad Diallo, Mason Mount leh Jadon Sancho ten inkhel bul an ṭan.

Dutch manager Erik Ten Hag chuan, "Pre season hi friendly ni mah se chak vek ka duh. Rosenborg nena kan result kha pawi ka ti. Rangers lakah erawh kan khel ṭha a, first half leh second half-ah a khel ṭha zawk kan ni ve ve," tiin a sawi a, goal khungtu Amad leh Joe Hugill te a fak bawk.