Khel ṭha SYS hmaah khel ṭha lo Bethlehem

LZ Juice MPL11-ah vawiin chhun dar 12:30 hian SYS FC leh FC Bethlehem te an inkhel dawn. SYS hian match thum aṭangin point sarih an hmu tawh a, Bethlehemin point an la hmu lo thung.

Coach Lalmuankima hoten season bul an ṭan ṭhat avangin match thum khelh zawhah semifinal an beisei ngam hial. Mahse, thla hnih khat chhung lekin thil a danglam thei erawh tih hriat a ṭha.

Kumin May 9, Ningani khan Bethlehem hian SYS hi 4-2 in an hneh a, First Division champion FCB tan MPL khelhna kawng a inhawng. Lunglei club erawh MPL khel turin playoff an khelh a ṭul pha a, Kolasib club Project Veng FC hnehin Mizorama league sang ber khel turin an tling ta tho.

MPL11-ah FC Bethlehem an inthuam ṭha a, chutihrualin coach Lalhriatpuia Sailo-in team ṭha zawk din tumin squad a siksawi a, an la tifuh rih lo. Match hnuhnung berah FCB hian an el tawk tura ngaih Sihphir Venghlun 4-2 in an hneh lo a, hei vang hian inrintawkna pawh a tlahniam ang.

Chutihrualin FCB hian Sihphir Venghlun an hneh loh zawhah season liam ta Chawnpui assistant coach T. Lalthantluang an la lut a, Republic Veng tlangval T2-a hian MPL a hriat ṭhat avangin Bethlehem tan a tawnhriat a pawimawh thei ang.

Mahse, MPL Qualifier aṭangin thla hnih vel chauh la liam mah se SYS hi chak tura rinkai zawk an ni tho tho. Lalmuankima'n player naupang chungah rinna a nghat a, player-te an inhriat chian bawk avangin Bethlehem lakah chak ngei an tum ang.

SYS captain F. Malsawmtluanga pawh damlohna vangin Mizoram Police a hmachhawn theih loh hnuin Bethlehem an hmachhawn hunah a rawn kir theih a rinawm. Chutihrualin Lunglei club hian chak an tum dawn avangin tlarhma player Lalruatsanga, Ricky H. Vanlalhriatsanga leh Andreas Lalhmingmuana te an pawimawh leh dawn a midfielder Joel Lalramengmawia'n team a uap lum a ṭul bawk ang.