Newcastle tana rinawm Howe

England team enkawl tur an zawng mek a, hming lamrik zingah Eddie Howe a tel - mahse Newcastle United manager hian Magpies lo chu thil dang ngaihtuah a nei rih lo tih a sawi thung.

Euro 2024 final-a an chak loh hnu lawkah Gareth Southgate a bang a, tun thlengin Southgate hmun ruak luah tur hi tihchian a la ni lo. Three Lions hi a zawnin Euro final-ah an chak lo a ni.

England rama football thuneitu sang Football Association chuan manager an zawng mek, manager remchang an zawn zingah Howe pawh a tel ngei - mahse Newcastle chief executive Darren Eales chuan an manager hi chhuahtir an tum lo tih a lo sawi tawh.

Tun dinhmunah Newcastle hi season thar atan an inbuatsaih mek - Germany ramah ngawrh takin training an nei. Howe chuan, "Magpies manager ka ni thei hi ka lawm a, ka tan chuan inchhuanna tham a tling.

"Player, hnathawktu leh min ṭantu mipui hi ka ngaina em em a, he hmun hi a nuam pawh ka ti. Hnathawh nei lai ka nih avangin ka rilruah hna dang a rawn lut rih lem lo bawk.

"Newcastle United-ah hian ka hlim a, chhung lam leh pawn lam aṭanga thlawpna ṭha ka dawng a nih chhung chuan he hmuna awm hi ka tum, a chhan chu Newcastle tana hnathawh hi nuam ka ti," tiin a sawi.

Howe hian kum 2021 November thla aṭang khan Newcastle enkawl hna hi a thawk ṭan, club neitu thar an neih hnu niin player leina tur sum an nei bawk, chutihrualin uchuak takin sum an hmang lo thung.

English manager hian a enkawl thiam tur leh a mamawh player a lakhawm a, zawimuangin team nghet tak a din. Season hmasa khan Premier League-ah palina niin, tun season chu Champions League an khel phak dawn a ni.

Nipui hmasa khan contract a ziak thar a, a rei zawng tarlan ni lo mah se kum khat aia rei tih a ni. Magpies tan hmathlir leh hmabak tam tak a nei, chuvangin season thara chona hmachhawn a châk tih a chiang.

Premier League season thara an match hmasa ber atan August 17 hian Southampton an hmachhawn dawn. Season thar chungchang zawhna chhangin Howe chuan, "Titi lengvak a tam a, kei pawhin ka lo hre ve bawk. Ka thil tum erawh a danglam phah lo.

"Ka sawi tawh angin Newcaslte United manager nih hi a nuam ka ti, min thlawptu ṭha em emte nena season thar hman hlan ka nghakhlel a, season ṭha tak kan hman theihna turin inbuatsaihna ṭha kan neih a pawimawh bawk," a ti.

Football Association (FA) lam pawhin Three Lions enkawl tur hi an dap reng a ngai dawn a, muangchan viau pawh a rem lo mai thei. September thlatir hian Republic of Ireland nen Nations League an khel dawn a ni.