Ngai ka awh chho mek - Nadal

Rafael Nadal chuan tun hnaiah tluang takin tennis a khel ve leh thei tawh a, ngai la awh rih chiah lo mah se a dinhmun pangngai ang nei let turin hmalam a pan mek zel tih a sawi.

Grand Slam vawi 22 champion tawh Nadal hi Paris Olympic khel turin a inbuatsaih mek a. Bastad-ah Swedish Open a khel a, nizan khan seeded pasarihna Nuno Borges nen final an khel a, result erawh kan hre hman lo.

Kum 38 mi Nadal chuan, "Tournament awlsam tak a ni lo a, match ka khelh zawng zawng mai kha a hautak thei hle. Final ka thleng leh thei ta erawh chanchin lawmawm bik a ni.

"Ngai awh leh thei ila tih hi ka duhthusam a ni a, chumi tur chuan theihtawp pawh ka chhuah ṭhin. Kum khat liam ta khan ka khel bawr zai niin a hnu lam hi a harsa ta hle, tunah erawh na nei loin ka inkhel thei," a ti.

Spanish star hian tennis a khelh hun chhungin final vawi 131 a khel tawh a, heng zinga 72 chu a inkhelh thiamna hmun clay court-ah a ni a, kumin Olympic hi clay-ah an khelh dawn avangin beiseina a nei sang ang.

Swedish Open-ah hian Nadal hi doubles huangah pawh a inlan, a ṭanpui Casper Ruud nen Inrinni zan khan semifinal khel tur ni mah se singles final a ngaih pawimawh avangin an inhnukdawk ta zawk a ni.