Belgium leh Israel inkhel entu awm dawn lo

Israel leh Gaza buaina vangin Nations League khelh dan phung pangngai angin an khel thei lo. September 6 hian Belgium chuan Debrecen, Hungary-ah Israel hi an lo mikhual dawn a, a hmuna entu an awm thei lo ang.

Israel-Gaza buaina hian European ramte pawh a nghawng, heng zingah hian Belgium pawh an tel. A tira ruahman dan chuan ram pahnihte hi Brussels-ah inkhel tur an ni a, mahse buaina nasa zawk chhuak thei a nih avangin a remchang lo.

Belgian Football Federation (RBFA) chuan mikhual an thlen theihna turin an khawpui hrang hrang an zirchiang kual a, mahse remchang a awm lo. Hei vang hian Hungary-ah an inkhelh a ngaih phah dawn a ni.

RBFA chuan thuchhuah siamin, "Belgium khawpui hrang hrang biak kual an ni a, amaherawhchu Red Devils leh Israel inkhel hi tualchhung thuneitu lamin an remti lo zel. Hei vang hian RBFA chuan thutlukna hran a siam a ngai ta a ni," an ti.

Nikum October thla khan Belgium leh Sweden te an inkhelh dawnin, silai keng mi pakhat chuan Swedish mi a lo kap hlum tawh a, hei vang hian FIFA chuan Belgium ram dinhmun hi a lo ngaihtuah tawh bawk.

Harsatna nei loa an khelh lai chuan King Baudouin Stadium, Brussels hi Belgium-in mikhual an thlenna hmunpui ber a ni a, tunah erawh an duh angin thil a kal thei rih lo a ni.