Serie A club enkawl tur Fabregas

Cesc Fabregas chuan season thar aṭangin Como enkawl hna a thawk dawn - Serie A club kai thar tan hian a hmain assistant head coach hna a lo chelh tawh bawk a ni.

Kum 37 mi Fabregas hian season li daih contract a ziak a, kum 21 teh meuh mai hnuah Italian football inelna sang ber an khel dawn - Fabregas leh a naute tan chona lian tak a ni ang.

Arsenal, Chelsea leh Barcelona midfielder hlui Fabregas chuan, "Head coach ni chunga season thar bul ka ṭan thei tur hi ka lawm a, ka chunga rinna nghattu club thuneitute min beisei ang thlentir kan tum ang.

"Keimah chauh ni loin ka thawhpui leh player zawng zawngte tan pawh chona a ni dawn, tum thuhmun leh ngaihdan inang nei awmkhawm kan ni a, engtiang chena thui nge kan kal theih tih pawh hriat a châkawm," a ti.

Player a nih lai chuan Fabregas hi midang chunga leng zinga mi a ni - club lamah hlawhtlinna hrang hrang a chan bakah an ram Spain tan World Cup leh Euro nomawi pahnih a chawipui a ni.

Serie A bul an ṭanna chu Juventus an ni dawn. August 19 hian Italian champion vawi 36 ni tawh an hmachhawn dawn a, a phurawmna aiin a huphurhawmna a sang zawk mai thei bawk.