Lionel Messi an chawimawi

Inter Miami chuan an player Lionel Messi chu nimin khan an chawimawi - an captain hian Argentina chu Copa America champion a nihpui a, nomawi 45 chawi tling tawhin khawvel footballer zinga champion tam ber a ni.

Nimin zing khan Inter Miami leh Chicago Fire ten Major League Soccer (MLS) an khel, inkhelh ṭan hmain Messi hi nomawi 45 a chawi tawh lantirna an pe a, academy naupangten a nomawi chawi tawh hrang hrangte chu a lem nen an lantir bawk.

Ballon d’Or vawi riat dawng tawh Messi hi kerek ding lam hliam vangin a inkhel thei lo mek, final-a Colombia an hmachhawn ṭuma a hliam vang hian a chawlh rih deuh chu a ngai dawn a ni.

Messi-a'n Copa America a khelh lai pawhin Inter Miami hian ṭha takin MLS an lo khel zel, nimin zing inkhelah pawh Chicago Fire hi 2-1 in an hneh - Matias Rojas leh Jordi Alba ten goal khat ve ve an khung.