Chibai 2020 Engin nge Indian football hmuak?

Kum 2020 kan kai a, football league hrang hrang te an kal ngaiin an kal mup mup a, India ramah pawh Indian Super League leh I League khelh chhunzawm nghal an ni. 

Second division league khelh turin Indian football a hmuak bawk a, chutiang karah chuan kum 2020-a thleng tur international football engemaw zatin Indian football-a hmuak bawk. India telna tur international football min hmuaktu langsar zingah FIFA Under 17 Women's World Cup chu India thlen tur a nih avangin ngaihven a hlawh lehzual a ni. 

India tan World Cup 2022 chu beisei loh a fuh zawkin a lang tawh a, match li an khelh tawh aṭangin Blue Tigers hian point thum chiah an la nei. March 26 khelhah India hian qualifier an khel ṭan leh dawn a, Asian champion Qatar an mikhual dawn avangin an hmabak a awlsam lo hle. 

Qatar hnuah hian Bangladesh chu June 4-ah an lenchilh ang a, June 9-ah Afghanistan an mikhual ve leh bawk ang. 

Asia khawmualpuia kum 16 hnuai lam player ṭhate inelna AFC Under-16 Championship khel turin India an tling chiang tawh a, draw neih a la nih loh avangin India hmachhawn tur a la hriat loh. India U16 tan qualifier-ah Isac Zomuanpuia leh Amosa Lalnundanga te an tel avangin Asia rawlthar footballer ṭha rual zingah Mizo kan hmu ngei dawnin a lang. 

Blue Tigers rawltharte hi pot 3-ah Iran, Yemen leh Saudi Arabia-te nen an awmho a, inelna hi September thla khian Bahrain chuan a thleng dawn a ni. 

Kum 2017-a FIFA Under 17 Men's World Cup a thlen hnuah AIFF-in hmeichhe lam a hawi a, FIFA U17 Women's World Cup 2020 chu India-in a thleng dawn. India U17 hmeichhe team chu a thlengtu an nih avangin tling chiangsa an ni a, Japan leh North Korea chu tling tawh bawkin ram dang tel tur erawh a la chiang lo. 

Inelna hi November 2-ah khelh ṭan tur a ni dawn a, November 21-ah final khelh a ni ang. Bhubaneswar, Kolkata, Guwahati leh Ahmedabad khawpui te chuan inelna hi an thleng dawn. 

World Cup qualifier khelh mekah India-in an group-a pahnihna dinhmun an hauh phak loh chuan Asian Cup qualifier an khelh a ngai dawn - group pariata pahnihna zinga a ti ṭha pali chu World Cup qualifying third round leh Asian Cup khel turin an tling dawn a ni. 

Pahnihna zinga a hniam pali chuan pathumnate nen Asian Cup qualifying third round an khel ang a, palina zinga a ti ṭha paliin an zawm bawk ang. India hi heng zingah hian a la tel phak lo cheu a nih chuan playoff a khelh a ngai dawn a, playoff round hi September aṭanga khelh ṭan tura tih a ni. 

Asia khawmualpuia hmeichhia kum 16 hnuai lam inelna qualifiers chu October aṭanga khelh ṭan tur a ni a, India pawh khelh ngei tumin a inbuatsaih. Asian Football Confederation (AFC) lam chuan qualifier khelh ṭan thla tur tichiang tawh mah se a ni (date) tak erawh tihchian a la ni lo thung. 

AFC U16 Women's Championship hi nikumah khelh a ni a, Japan chu a vawi li nan champion-in nomawi chawi ngun ber an ni. Inelna tak hi 2022-ah khelh leh tur a ni. 

India hmeichhe footballer, kum 19 hnuai lam te chuan AFC Under 19 Women's Championship 2022 khelh tumin qualifier an khel dawn a, November-ah neih ṭan tur niin a ni (date) tak erawh a la chiang lo. Blue Tigers tleirawlte hi an vanduai a, nikuma AFC U19 Women's Championship-ah khan qualifier-a khel ṭha tak chungin an tling zo lo a ni. 

India hi Thailand leh Nepal nen qualifier group B-ah awmin point ruk ṭheuh an nei a, goal difference nen pawh Nepal aiin ṭha mah se head-to-head en a nih avangin a vanduaiah an ṭang a, an tla.