Europe-a football thiam ber Treble champion Bayern Munich

UEFA Champions League final hmuhnawm takah German champion Bayern Munich-in French champion Paris Saint-Germain chu 1-0 in an hneh a, Europe-a football thiam ber an ni.

Pathianni zana goal awm chhun hi Kingsley Coman-a'n minute 59-naah a inzir chhuahna PSG lamah a tauh lut.

Hans-Dieter Flick hote hian Champoins League, Bundesliga leh DFB Pokal nomawi chawi vekin treble champion an ni a; 2012-13 season khan Jupp Heynckes hoin an treble champion tawh bawk.

Champions League-ah Cristiano Ronaldo leh Lionel Messi te an langsar ṭhin a, Neymar hun a inher chhuak dawnah a ngaih theih. Amaherawhchu Bavarians-in tum dan dang an nei a, player tin ṭangrualin team angin hnehna an chang.

Team pahnihin tum dan inang lo an nei a, Flick-a'n a tih dan pangngaiin a khingpuite defence thlengin pressure a pe ngam a, defence leh keeper inkar a la ti zau tho. Manuel Neuer-a'n hmun ruak zau tak a rawn hnawh khat a, keeper-sweeper tia an sawi ṭhin kha a la ni reng. Chutihrualin Lyon nena an khelh ṭum angin Alphonso Davies leh Joshua Kimmich te an chhuak nasa lo deuh a, Bavarians an fimkhur.

PSG erawhin tlarhma pathum Kylian Mbappe, Neymar leh Angel Di María hmang chauhin pressure an pe a, midfielder-te erawhin anmahni mual chinah pressure an pe ve thung. 

Thomas Tuchel-a nauten hna an thawk ṭha a, Thiago Silva leh Presnel Kimpembe te inkawpin Robert Lewandowski leh Thomas Muller te an dah ṭha. Amaherawhchu PSG tlarhma chance ṭha hlah a pawi a, Manuel Neuer-a chet ṭhat zan a nih bawk avangin German club an vannei ta zawk.

Final hmuhnawm takah Bayern-in ball possession 62% an chang a, midfield battle-ah hnehna an changah a ngaih theih. Spanish midfielder Thiago Alcantara-a'n Bayern jersey a hak hnuhnun ber tura ngaih theihah a class sanzia a pholang a, inkhel tempo siamtu a nih bakah Neymar duh thala a chet loh nan a veng ṭha hle.

Leon Goretzka-a'n coronavirus chawlh hmang ṭhain a taksa lenna a rawn hmang ṭangkai a, Bayern player hlui Mark van Bommel nena khaikhin turin midfield-ah a rorum hle. Thomas Muller a langsar tawk lo a, amaherawhchu German forward thawhrimzia hmuh hmaih rual a ni lo. Kum 30 mi Muller hian a tawp thlengin a ti hram hram a, hei hi German club-in nomawi an chawi theihna chhan pawimawh tak pakhat chu a ni.

Paris-a piang leh chengte hi Parisian an ti a, Kingsley Coman hi Parisian a ni. Coman hian kum riat a nihin PSG hi a zawm a, football khelh dan hmang a zir ṭanna hmun a ni. February 17, 2013 khan Sochaux an hmachhawnna inkhelah minute 87-naah Marco Veratti a thlak a, kum 16, thla riat leh ni li mi chauh niin PSG tana khel thei naupang ber a ni.

Parisian fapa hian Ligue 1 nomawi vawi hnih a chawi hnuin Juventus panin Serie A nomawi vawi hnih a chawi a, Bayern Munich-ah kal lehin league nomawi vawi nga a chawi leh tawh bawk. Coman hi kum 24 mi chauh a ni a, nomawi 24 zet a chawi tawh. Heng zinga hlu ber chu UEFA Champions League a ni a, final-a goal awm chhung khungtu a nih bakah man of the match-a thlan a ni bawk.

PSG keeper Keylor Navas a dam a, final-ah bul a ṭan. Thomas Tuchel-a'n outfield player zingah semifinal-a inlante bawk a hmang. Hansi Flick-a'n semifinal-a Lyon hnehtute aṭangin player pakhat chauh a thlak a, Ivan Perisic aiah Kingsley Coman a luhtir.

18'     Mbappe-a ball pek chu Neymar-a'n um lutin keeper Neuer chiah a hmachhawn tawh a, angle erawh a zim deuh. Brazilian forward hian goal-ah pet mah se German keeper-in 

ṭha zetin a kein a dansak a, Neymar hian a per chu a pet leh hman nachungin Neuer a inrawlh hman leh bawk.

22'    Box chhungah Lewandowski-a'n a ke dinglamin ball a la thla a, a ke vei lamin a hlap nghal a, goal ban a per.

24'     Di Maria leh Herrera ten ball an inpek kual hnuah Argentine forward-in goal-ah a pet a, yard 10 vel leka hla aṭangin a pet over!

25'     Minute 25 lekah hliam vangin Jerome Boateng thlak a ngai a, Lammuala inkhel tawh Niklas Sule-a'n a rawn thlak.

29'     Neymar freekick aṭanga ball per chhuak chu Ander Herrera-a'n kawh zetin a volley nghal a, Muller a per hnuah goal pawnah a kal.

32'     Serge Gnabry-a'n dinglam aṭanga a cross chu Muller-a'n tauh pialin Lewandowski-a'n goal-ah tauh hman hram mah se keeper Navas-a zawnah a kal.

45+1'     Mbappe leh Herrera ten Bayern tlarhnung chiang zetin an ṭhiat, French forward-in goal ngei tura ngaihah keeper Neuer-a zawnah a pet.

45+2'     Coman-a'n box chhungah lalutin Kehrer nen an inchuhnaah a tlu. Bayern-in penalty an beisei a, VAR en hnuah penalty pek a ni lo.

59' - GOAL : Yard 20-ah Kimmich-a'n ball per a chang fuh a, German player hian rilru fim takin box chhungah a cross lut. PSG right back 

Kehrer chu vengtu nei lo Lewandowski ven tumin tawlh hma hret mah se ball-in a khum a, Coman-a'n a tauh lut.

61'     Coman-a'n a ball hmuh chu vawi khatah a shot-cross nghal a, captain Thiago Silva-a'n a pet chhuak. 

62'     Coman-a'n Kehrer tan harsatna a siam zui a, a ball cross ṭha tak chu Lewandowski inrawlh hmain Kimpembe-a'n a tauh chhuak hram.

68'     Kingsley Coman leh Serge Gnabry aiah Ivan Perisic leh Philippe Countinho te an rawn lut a, PSG defender Kehrer tan thawk huaina tham a tling ang.

71'     Marquinhos-a'n vei lam aṭanga a ball hmuh chu goal-ah pet mah se Bayern keeper 

Neuer-a'n ṭha zetin a ke vei lamin a dang.

75'     Box chhungah Kimmich-a'n Mbappe-a ke hnung lam a pet fuh a, referee-in penalty a pe lo. VAR hmangin en let se thutlukna a danglam thei ang.

83'     Bayern-in Lewandowski hmangin counter attack an nei a, veteran defender Thiago Silva-a'n fing takin a hlauhawm hmain a ti tlu. Yellow card a chawi.

89'     Choupo-Moting-a through ball chu Mbappe tan duhthusam a ni a, Neuer-a'n ṭha zetin a dansak. German keeper hian dang ta lo pawh ni se assistant referee-in offside flag a phar tho.

90+3'     Injury time minute nga pek a ni a, a hmuhnawm hle. PSG-in Neymar leh Mbappe thiamna leh tlan chakna hmangin Bayern an rum ṭhaih a, amaherawhchu French club vanneih zan a ni lo.

90+5'     Referee-in inkhel a ham tawp a, Bayern Munich 1-0 in an chak.

Bayern Munich an treble champion theih nan Robert Lewandowski-a'n goal 55 a khung a, season a hman ṭhat ber ṭum a ni. Thomas Muller-a'n Bundesliga-ah assist vawi 21 neiin assist record thar a siam a, Lewandowski ang thoin a che ṭha. Amaherawhchu Bayern-in mimal pakhat chauh chunga lawmthu an sawi dawn a nih chuan an manager Hansi Flick-a chungah hian 'Danke' (Ka lawm e) an tih a ṭul ang.

Niko Kovac-a hnuaiah Bayern-in season bul an ṭan a, ro an relna ṭhin Bundesliga-ah pawh nomawi hloh thei dinhmunah an ding. Croatian manager hmunruak luah khattu Hansi Flick rawn inlan hnuah Bayern-in kawng engkimah hma an sawn. Flick-a hnuaiah Bayern-in match 36 an khel a, vawi 33 chakin vawi khat an inhnehtawk a, vawi hnih chiah an chak lo. Goal 116 zet an khung a, goal 26 chhuahin an goal difference pawh 90 a tling pha a, match tina goal 3.2 khung ang an ni.

Champions League champion tur hian Bayern Munich-in an khingpui zawng zawng an hneh a, quarterfinal-a Barcelona 8-2 a an sawp ṭumte chu khawvelin a hre reng tawh ang. Hansi Flick chuan, "Ka team-te ka chhuang hle. Kan hmasawnna hi a lawmawm ka ti a, coronavirus vanga kan chawlh pawh kan hmang ṭangkai hle. Tuna kan hlawhtlinna hi tute tan pawh a ni a, Bayern tana thawktu zawng zawng leh min puitute tan a ni," tiin a sawi.

GROUP STAGE 

Bayern Munich 3-0 Red Star Belgrade

FCB : Kingsley Coman 34'; Robert Lewandowski 80'; Thomas Muller 90+1'

Tottenham Hotspur    2 - 7    Bayern Munich

TOT : Son 12'; Kane 61' (P) 

FCB : Joshua Kimmich 15'; Robert Lewandowski 45'; Serge Gnabry 53', 55', 83', 88'; Robert Lewandowski 87'; Serge Gnabry 88'

Olympiacos FC    2-3    Bayern Munich

OLY : El Arabi 23'; Guilherme 79'

FCB : Robert Lewandowski 34', 62'; Corentin Tolisso 75'

Bayern Munich    2 - 0    Olympiacos FC

FCB : Robert Lewandowski 69'; Ivan Perisic 89'

Red Star Belgrade    0 - 6    Bayern Munich

FCB : Leon Goretzka 14'; Robert Lewandowski 53 (P), 60', 64',68'; Corentin Tolisso 89'

Bayern Munich    3 - 1    Tottenham Hotspur

FCB : Kingsley Coman 14'; Thomas Muller 45'; Philippe Coutinho 64'

TOT : Sessegnon 20'

ROUND OF 16

Leg 1 : February 20, 2020

Chelsea FC    0 - 3    Bayern Munich

FCB : Serge Gnabry 51'; Serge Gnabry 54'; Robert Lewandowski 76'

Leg 2 : August 8, 2020

Bayern Munich    4 - 1    Chelsea FC

FCB : Robert Lewandowski 10' (P); Ivan Perisic 24'; Corentin Tolisso 76'; Robert Lewandowski 84'

CFC : Abraham 44'

Quarterfinal : August 14, 2020

Barcelona    2 - 8    Bayern Munich

BAR  : David Alaba 7' (og); Luis Suárez 57'

FCB :  Thomas Muller 4', 31'; Ivan Perisic 22'; Serge Gnabry 27'; Joshua Kimmich 63'; Robert Lewandowski 82'; Philippe Coutinho 85', 89'

Semi-final : August 19, 2020

Lyon    0 - 3    Bayern Munich

FCB : Serge Gnabry 18', 33'; Robert Lewandowski 88'

Final : August 23, 2020

Paris St-Germain     0 - 1    Bayern Munich

FCB : Kingsley Coman 59'

PSG tana inlan : Keylor Navas; Juan Bernat (Layvin Kurzawa 80'), Presel Kimpembe, Thiago Silva, Thilo Kehrer; Leandro Daniel Paredes (Marco Veratti 65'), Marquinhos, Ander Herrera (Julian Draxler 72'); Kylian Mbappe, Neymar, Angel di Maria (Eric Maxim Choupo-Moting 80')

FCB tana inlan : Manuel Neuer; Joshua Kimmich, Jerome Boateng (Niklas Sule  25'), David Alaba, Alphonso Davies; Thiago Alcántara (Corentin Tolisso 86'), Leon Goretzka; Philippe Coutinho (Serge Gnabry 68'), Thomas Muller, Kingsley Coman (Ivan Perisic  68'); Robert Lewandowski