Fak phu LeBron James an fak

Italian artist Leonardo da Vinci chuan lemziak hmingthang Mona Lisa a nei a, German composer Ludwig van Beetho-ven-a'n a ri reh tawh ngai lo tur Fifth Symphony a phuah bawk. LeBron James tan Golden State Warriors hneha an khaw club Cleveland Cavaliers a vawi khatna atana champion pui kha chanchin chhinchhiah tlak bik a ni thung.

American power forward James hian Cleveland beseina mei mit ṭep tawh chhawm nung lehin 2016 NBA Finals Game 7-ah Golden State Warriors lakah 93-89 in hnehna a chan pui a, Akron, Ohio-in kum 52 chhung zet major sporting title an lo ngah tawh chu hlawhchhuah puiin NBA Finals Most Valuable Player atan a ṭum thum nan thlan a ni.

Cleveland small forward Richard Jefferson chuan, "Player ropui James a chungchang hi zawhna ka dawng nasa hle a, basketball mi bik hian chanchin thar langsar a ziak mek a, ani rual hian kan kal ve mek bawk. Kum nga dang lo la awm turah pawh khawvela a ṭha ber a la ni zel ang," tiin a sawi.

Kum 31-a upa James khan Finals game 7 bikah khan point 27 a score bakah rebound vawi 11 lain assist ṭum 11 bawk neiin triple double a nei a, Cavs basket hnuhnung ber chu free throw
aṭanga a vawm luh a ni bawk.

NBA Finals Game 7 chan-chinah Los Angeles Lakers stars James Worthy (1988) leh Jerry West (1969) ten triple double an lo nei tawh a, anni pahnih tih lohah chuan James hi hetiang dinhmuna ding leh thei hmasa ber niin Finals bik hrim hrimah chuan vawi sarih ngawt triple double a nei tawh.

NBA regular season MVP atana a zawna kum hnih an thlan tawh Stephen Curry chuan, "Series pumpui kan thlir chuan James khan inkhel a thunun tih hai rual a ni lo. Basket nei tura vawm hun a hria a, kan chak lohna lai a hriain chumiah tak chuan min bei chat chat ṭhin, hnehna chan kha an phu e," tiin an hneh loh team hotupa a fak.

Team pahnihte 89-89 a an inhnek tawk mek lai leh hun tawp nana second 53 chauh a awm tawh tiha Cavs tana three point hlu bik vawm luttu Kyrie Irving chuan, "NBA champion han nih chiah khan engtiangin nge ka awm chiah pawh ka hre thiam lo a, a ropui a... a ropui a ni tawp mai," tiin hnehna changtu dinhmuna din theih lawmawm zia a sawi.

Regular season-a a naute vawi 73 hnehna chanpuia NBA record thar siampui theitu Warriors coach Steve Kerr pawhin James a chungchang sawiin, "Ani hi chu NBA chanchina player ropui berte zinga mi a ni a, Finals inkhel boruak thlak danglam theitu a ni," tiin infiamna lama an hmelma chu zah takin a fak.

Thawhṭanni zinga Oracle Arena, Oakland-a 2016 NBA Finals Game 7 inkhel kha US president Barack Obama pawhin Air Force One aṭangin a lo en ve a, champion team leh James a lawmpuina thu twitter-ah tarlangin, "King James-a'n Cleveland tana ropuina a hawn lai hmuh kha a hlimawm hle," tiin a sawi nghe nghe.

Ohio tlangval James hian kum 2003 khan a senior career chu Cleveland Cavaliers-ah bul
ṭanin Miami Heat tan 2010-2014 chhung khan a khel a, kum 2014 kha Cavs-ah kir lehin tunah chuan a duhthusam ram a thlenpui ta.