Thutlukna dik siama inngai Hodgson

England manager Roy Hodgson-a'n Slovakia an hmachhawn ṭumin players paruk a siksawi a, hnehna an chan zawh leh bawk si loh avangin English manager hian sawisel a hlawh a, a captain Wayne Rooney chuan inkhel bul ṭan tir a ni lo chu mak a tih thu a lo sawi ve bawk.

Mahse, England manager Hodgson chuan amah sawiseltute chhangletin, "Ka nauten an khelh ṭhat miau avangin ka duhthlannaah tisualin ka inhre lo a, inchhirna ka nei lo. Game ṭha lo tak khel ila chuan ka inchhir mahna," a ti.

Inter Milan pawh lo enkawl tawhtu Hodgson chuan sawi chhunzawmin, "Wayne Rooney khan inkhel bul ṭan se goal a khung ngei ang tih min tiam thei tu nge awm? Jamie Vardy leh Daniel Sturridge te inkhel bul ṭan tir turin min ngen a, ka ti a, anni tiam loh hian player pali chiah ka thlak danglam. Mahse, min sawisel an chak hrim hrim vangin player paruk thlak a, tisualah min puh a ni," tiin a lawm lo hle.

Slovakia an hmachhawn ṭuma captain arm band hrengtu Gary Cahill pawh-in an pu hi chhanin, " Thutlukna dik lo engmah a awm lo. Inkhel kan thunun em em a, kan hun ṭha neih kan chhawr thei lo zawk a ni," tiin player-te chu an chak loh chhanah dem tur an nih zawk thu a sawi.

England hian Euro 2016 khelh mekah chance vawi 65 insiam tawhin goal erawh vawi thum chiah an khung a, Russia (1-1) inhnehtawkpuiin Wales (2-1) an hneh a, Slovakia nen goal khung miah loin an inhnehtawk thung.

Football Association chairman Greg Dyke chuan Euro tawp ruala a contract hmang zo tur Hodgson chu France-a an naute a kaihhruai dan a zirin contract thar an zawrh tur thu a sawi a, tun dinhmunah chuan FA hi kum 68-a upa manager chungah hian an lungawi lo hle niin khawthlang media-te chuan an tarlang.