Euro 2016 - Group C Germany, Poland leh N. Ireland ten last 16 an lut
Thawhlehni zan khan Mario Gomez-a goal hmangin Germany-in European Cham-pion-ship Group C match hnuhnung berah Northern Ireland 1-0 in an hneh a, team pahnih hian last 16 an lut ve ve. Inkhel dangah Poland-in substitute Jakub Blaszczykowski hmangin Ukraine 1-0 in an hneh bawk a, he group aṭang hian Mykhaylo Fomenko hote chiahin knockout stage an thleng lo.
Team siksawi
Die Mannschaft-in Poland laka goal an khung loh hnuin tlarhma lam an siksawi a, kum 30-a upa Mario Gomez chu inkhel bul ṭantir a ni.
Feet ruk leh inches hniha sang striker Gomez a awm takah chuan Mario Gotze chu vei lam kilah sawn let a ni a, Julian Draxler-a'n khelhna hmun a chang lo. Euro 2016 ṭan hmaa hming langsar Thomas Muller chu match hnih khelh tawhah ding lam kilah awmin player naran a ni a, Northern Ireland nena an inkhelh ṭum hian Bayern forward hi striker puitu Mesut Ozil nen an intlan thleng bawk.
Schalke captain Benedikt Howedes chu FIFA World Cup an champion ṭumin vei lam kilah awmin match zawng zawng a khel a, Euro 2016-ah erawh right back-ah a awm thung. Tlarhnung position hrang hranga awm vek thei Schalke defender Howedes aiah hian Bayern Munich midfielder Joshua Kimmich chu right back-ah chhawr a ni.
Germany ṭha zawk
Point khat hmuhin Northern Ireland-in chhiarkawp danin last 16 lut chiang lo mah se inkhel dang result thlirin knockout stage an thlen ngei a rinawm avangin tlarhnung lamah player an rem tam a, amaherawhchu German attack na tak avangin an talbuai nghal hle.
Thomas Muller-a'n minute 8-na lekah a hlauhawmna a lantir a, Mesut Ozil leh Mario Gotze te pawhin Northern Ire-land keeper Michael McGo-ver tan hnathawh tur an pe nghal bawk. Germany forward Muller-a'n goal ban leh crossbar a tih per a, inkhel an thunun miau avangin Northern Ireland lam an vannei seng lo. Mesut Ozil leh Muller te thawhrah sengin minute 30-a'n Gomez-a'n Germany goal hmahruai a khung.
Germany-in inkhel an thu-nun tluan a, goal an khung belh theih loh avangin chance an ngah lo tihna erawh a ni lo. Die Mannschaft ten inkhel thunun viau mah se Gomez, Gotze, Ozil leh Muller ten goal an khung belh thei tawh lo.
Record nen Basti
Minute 69-naah Bastian Schweinsteiger chuan Sami Khedira a rawn thlak a, Man-chester United midfielder hian European Championship-ah a vawi 15 nan inlanin Germany tana Euro khel hnem ber a ni.
Germany hian Northern Ireland hneh turin harsatna an tawk lo a, amaherawhchu minute 76-naah Jerome Boateng chu a chawn hliam vangin Howedes-a'n a rawn thlak a, Bayern defender an lakchhuah chhan hi Joachim Low chuan a nat belh an hlauh vang a nih thu a sawi.
Eng nge an sawi?
Germany coach Joachim Low chuan, "Goal chance
ṭhahnem tak kan insiam a, kan hmang ṭangkai thei lo. Kan khingpuite tan goal chance kan siamsak lo a, amaherawhchu tlarhma lamah kan insiamṭhat a la ṭul a ni," tiin an ṭhat theih dan ber a la nih loh thu a sawi.
Northern Ireland coach Michael O’Neill chuan, "Goal venhim hrim hrim hi kan duhdan a ni bik lo a, amaherawhchu Germany team kan en chuan Bayern Munich leh Real Madrid bakah player ṭha tak tak an awm ṭheuh a, 7-0 a chak loh hi kei chuan ka duh lo. Chuvangin goal kan venhim mai kha kan tihtur a ni a, Paris-a world champion kan hmachhawn thei hi ka inchhuang em em a ni," tiin a sawi.
Poland an chak
Poland-in first half-ah goal an khung thei lo a, Ukraine lamin ṭum hnih lai penalty beisei mah se pek an ni lo thung. Second half-ah Jakub Blaszczykowski a rawn inlar a, Borussia Dortmund winger hlui hian Arkadiusz Milik ball pass chu minute 54-naah a khung a, goal dang a luh belh tawh lo.
Euro 2016-a tla hmasa ber Ukraine hian tun inelnaah goal an khung lo a, hetiang record duhawm lo tak hi Turkey (1996) leh Denmark (2000) te pawhin an lo nei tawh. Poland erawhin semifinal an thleng a, tuna an buaina awmchhun chu an striker chhuanvawr Robert Lewandowski-a'n goal a khung lo.
Eng nge an sawi?
Poland coach Adam Nawalka chuan, "Lewandowski-a'n goal la khung lo mah se hlauhthawnna tur erawh a awm lo. Khelmual chhugnah rim takin a thawk a, kan chakna kawngah player pawimawh a ni a, kan team tan player ṭangkai a ni. Kan inkhel leh hunah chuan goal a khung tawh ngei ngei ang," tiin an player pawimawh Lewandowski a chhan.
Ukraine coach Mykhailo Fomenko chuan, "Football hmuhnawm tak kan khelh avangin sawisel tur ka hre lo. Tuna an tawnhriat hi nakin zelah an hman ṭangkai zel ka beisei a, kan thawhrim chuan goal chu kan la khung em em ang. Tun inelnaah result ṭha kan hlawh chhuak lo a, chuvangin ka hmalam hun uluk taka ka ngaihtuah a ngai a ni," tiin a dinhmun tur a la sawi theih loh thu a sawi.
Group C inkhelh zawhah Germany leh Poland ten last 16 an lut a, zan laia Group B inkhel result avangin point thum lek hlawh chhuak Northern Ireland-in knockout stage an lut ve bawk.