Mumbai FC coach thar Santosh Kashyap

I League club Mumbai FC chuan kum sarih chhung zet an coach lo ni tawh Khalid Jamil an ban hnuah Santosh Kashyap chu coach thar atan an la lut.

Kum 49-a upa manager hian season hmasa khan Salgaocar FC chu season laklawhah enkawlin tlak hlauhawma ding Goan club hi a chhanhim a, season tawp lamah erawh club neitute nen an inhmuhthiam loh avangin banna a thehlut a ni.

Mumbai FC deputy vice president Atul Badgamia chuan Kashyap an la lut thei chu a lawm thu sawiin, "Santosh hi Indian football-a coach ṭha ber pawl a ni a, player-te rilru hneh thei tak niin I League a hrechiang em em bawk a, kan hnena lokal a thlang hi kan lawm a ni," tiin an coach thar chungchang a sawi.

Royal Wahingdoh-a enkawl laia mipui beisei phak baka a team kaihruaitu Santosh Kashyap chuan, "Mumbai FC manager thar ka ni thei hi ka tan chuan hmasawnna ropui tak a ni. Mumbai khawpuia football club lian ber ka enkawl dawn a, football ka lo khelh tawhna hmun ngeia ka kir thei hi ka lawm a ni," a ti.

Player a nih laia Mumbai club lian ṭhin Mahindra United tana khel tawh Kashyap hian Air India leh Mohun Bagan a lo enkawl tawh bawk a, Indian Super League-ah NorthEast United assistant coach dinhmun lo chelh tawhin Indian football-ah a mikhual lo hle.