Wimbledon atan Djokovic a inpeih
Kumina Grand Slam tournament pathumna tur Wimbledon chu June 27 aṭanga July 10 chhung khian London, United Kingdom-ah khelh a ni leh tawh dawn a, he hun atan hian Novak Djokovic chuan a inpeih tawh thu a sawi.
Nimin khan kumin Wimble-don khel tur seeded list tih chhuah a ni a, mipa leh hmeichhe single-ah mi 32 ve vein seeded an chang. Mipa single-ah Djokovic hi pakhatna niin 2013 champion Andy Murray leh vawi sarih champion tawh Roger Federer ten an zui a, Stan Wawrinka chu palina a ni. Rafael Nadal erawh a ban rek na vangin a inlan thei dawn lo a ni.
Hmeichhe single lamah world number 1 Serena Williams chu seeded pakhatna a ni a, Garbine Muguroza chu pahnihna a ni. British player zinga tawng sar ber chu Johanna Konta niin seeded 16-na a ni phak.
French Open-a a champion hnuah world number 1 Djokovic hi Grand Slam tournament paliah a champion kim ta chiah a, an khelh hmabak Wimbledon-ah pawh hian tun hnai kum hnih chhunga a champion ve ve avangin kuminah pawh hian player deh khirh ber a ni leh tura ngaih a ni.
Kum 29-a upa Djokovic hian Paris-a Andy Murray a hneh chiah khan Grand Slam-ah vawi 12 a champion-na niin vawi 14 champion tawh Nadal leh Federer (17) te hnaih chho ve tawh hle a, tun anga a khel ṭha tluang zel a nih chuan player ropui pahnihte hi lehpel thei dinhmunah a ding mek.
Beiseina a neih thu sawiin Djokovic chuan, "Midang chunga leng anga insawi ka duh ngai lo a, mahse kan damchhung hian kan tuma kan bei a nih chuan eng pawh hi kan hlawh chhuak thei. Tunah chuan phur taka inkhel turin ka inpeih e," tiin a sawi.
Roland Garros-a a hlawhtlin chiah khan Djokovic hian lawmman aṭang chauhin dollar maktaduai 100 a dawng tling chiah a, tennis mipa player zingah lawmman aṭangin ani aia sum la lut hnem an awm lo.
Grand Slam hi best of five hmanga khelh ṭhin a nih avangin player kum tam deuh tawh tan hlawhtlin a harsa. Kuminah hian Djokovic hi Wimbledon-ah hian a champion thei a nih chuan kum 1975-a champion Arthur Ashe (31) hnua he inlanaa champion thei upa ber a ni ang.