Copa America Centenario US ngam loh Messi leh Argentina

Lionel Messi leh Argentina chu Copa America Centenario thlengtu United States-in dan tum mah se an dang zo lo. Nilaini zing khan freekick ropui hmangin Messi-a'n an ram chu Copa America kum 100 tlinna puala inelnaah final a hruai thlen bakah Argentina tana goal khung tam ber record a siam.

US coach Jurgen Klins-mann-a'n inkhelh ṭan hmain Messi leh Argentina an hlauh loh thu sawi mah se khelmual chhungah erawh an ngam lo chiang hle. Gonzalo Higuain goal hnih bakah Ezequiel Lavezzi leh Messi goal hmang-in Argentina 4-0 in an chak a, Chile leh Colombia inkhela chak zawk nen Thawhṭanni zing dar 5:30-ah final an khel ang.

Zan lungngaih thlak

NRG Stadium, Houston-a inkhelah kumin kumtira Chinese club Hebei China Fortune zawmtu Lavezzi-a'n inkhel bul a ṭan a, minute thumna lekah Barcelona star Messi ball pet chu nuamsa takin Paris Saint-Germain forward hlui hian tauh lutin US zan lungngaihthlak (Keini lama zing kar) bul ṭantu a ni.

Kum 31-a upa Lavezzi hian second half-ah ball dan a tumna lamah khelmual sira LED advertising board-ah a inbin liam a, a kiu leh dar a tih nat avangin lak chhuah a ngai a, a kiu hi zai a ngaih dawn avangin Copa America-ah a hmel kan hmu tawh dawn lo. US an hmachhawn ṭum hian Totten-ham midfielder Erik Lamela chuan Lamela hi a ranw thlak.

United States hi an ṭhat dan berin an inlan thei lo a, Jer-maine Jones, Bobby Wood leh Alejandro Bedoya te chu hrem vangin an chhawr theih loh bakah an innghahna Clint Dempsey-a'n beisei a phak lo bawk. German coach Klinsmann-a naute hian inkhelh chhung zawngin Argentina goal zawnah an pet miah lo!

Messi chu Messi

Argentina thiampuipa Messi chu khelmual chhunga player hmuhnawm ber a ni. Catalan club duhlai hian minute 32-naah yard 25 a hla aṭangin a ke hman thiam veilam ngeiin maiin freekick a pet a, US goal keeper Brad Guzan tana dan ngaihna awm lo turin goal ban leh bar inkar kilah tak a thlawh lut.

Second half-ah Higuain a rawn inlar ve thung a, Napoli striker hian minute 50 leh 86-naah goal khungin tun tournament a a goal lina a tlin ve bawk. Serie A top scorer hian league round match thumah goal khung lo mah se knockout stage-ah erawh rintlak a nih zia a ti lang zel a, quarterfinal-a Venezuela an hneh ṭumin goal hnih a khung tawh bawk.

Record thar

Copa America Centenario khelh ṭan dawn khan hnungzâng na vangin Messi a buai a, an match hmasa bera Chile 2-1 a an hneh ṭum pawhin a inlan lo. Panama 5-0 a an sawp ṭumin goal thum nen a lo kir a, quarterfinal-a Venezuela an hneh ṭumin goal khat khung zui bawkin Argentina tana goal khung hnem ber Gabriel Batistuta (54) record a nih rual chiah.

Kum 28-a upa Messi hian ram tan match 112 a khelh aṭangin goal 55 a khung thling ta chiah a, tunah chuan chuh buaitu awm miah loin Argentina tana goal khung hnem ber dinhmun a luah chiang ta a, a la khung belh zel pawhin a rinawm. Messi hnungah hian Batistuta (54), Hernan Crespo (35), Diego Maradona (34) leh Sergio Aguero (33) te an awm. Barcelona forward hnunga awm te hi an hunlaia khawvela ber kai pha ṭhiau an ni a, Aguero erawh Messi leh Cristiano Ronaldo te an awm avangin a vanduai ta deuh.

Ballon d'Or chawimawina vawi nga dawng tawh Messi hian kum 2005 aṭang khan an ram senior team-ah a inlan ṭan a, FIFA World Cup leh Copa America final khelh tawh mah se a la champion lo. Kum 23 chhung zet major tournament champion tawh lo an ram hi ropuina ram a hruai thlen kum a ni ve tawh mai thei.

Argentina tana goal khung hnem ber Messi chuan, "Record thar ka siam thei hi ka lawm a, hetiang dinhmun ka thlen theihna chhan chu Argentina tana ka khelh puite vang a ni. Tun hnaiah hlawhtlinna kan chang teuh ṭhin hle a, kumin hi chu kan tan kum ṭha a nih ve tawh ngei pawh kan beisei," tiin a sawi.

Eng nge an sawi?

Chak lo zawk an nihna pawm thiamtu Klinsmann chuan, "Khawvela team ṭha ber nen kan inhmachhawn a, a chak lo zawka kan ṭang kha a zahthlak loh. A bik takin Messi, Higuain leh Mascherano te khan fak an phu a, anni ho kha 'top class' chu an ni. Ka naute hnenah pawh lungngai lutuk lo turin ka fuih a, Copa America a sang pali zinga tel theih hi a chhe lo a, kan inzir belh zel a ni," tiin an thlen china a lungawi thu a sawi.

Argentina coach Gerardo Martino chuan, "Messi hi khawvela ṭha ber a nih zia hi inhrilh nawn fo a ngai tawh lo hial zawk a, ani leh kan team hi kan hlim hle. Tunah hian a ṭha ber kan ni tih a la hun lo a, final khelh zawhah a ṭha ber kan nih leh nih loh chu a chiang ang," tiin a la ṭawng pawr duh lo.