Croatia hmaah Spain an hawihai

Thawhlehni zan Euro inkhelah Croatia-in Spain an barakhaih a, Group D hmahruaitu ni turin champion lai hi 2-1 in an hneh. Croatia-in group hmahruaitu an nih avangin last 16-ah Italy an pumpelh a, Spain Euro zinkawng a harsa sawt dawn.

Group D inkhel dangah Turkey chuan last 16 luh beiseina chhi nung turin Czech Republic chu 2-0 in an hneh bawk a, nizan group dang inkhel results a zirin knockout stage an luh leh luh loh a chiang ang.

Croatia an thiam

Inkhel ṭan hmain Croatia-in Spain an hneh theih ringtu tam lo mah se khelmual chhunga an inlan meuh chuan Croatia thiamzia kan hmu a, goal khung hmasatu erawh Spain an ni.

Spain tan Cesc Fabregas-a'n keeper Danijel Subasic man phak lohin ball a pet a, he ball kal hi Alvaro Morata chuan minute 7-naah an hmahruaina ni turin a khung. Barcelona midfielder Ivan Rakitic-a'n Spain woodwork a pet per hnuah Croatia-in an si phurh an sut ta nge nge.

Minute 45-naah Ivan Perisic chuan mawi taka ball a lak luh hnuah Nikola Kalinic tan a siamsak a, Fiorentina striker hian player naran tana tih theih loh tiin mawi takin a kheng lut a, goal dinhmun chu 1-1 a ni.

Spain-in second half-ah penalty hmangin hmahruaina hun ṭha nei mah se, captain Sergio Ramos-a'n goal laiah tak a kangin a pet a, Monaco keeper Subasic-a tan dan harsa a ni lo.

Minute 87-naah Croatia-in an phu ang ngeiin chakna goal an khung, counter-attack aṭanga ball kal chu Perisic chuan field sirah chak taka tlan luh puiin Spain goal-ah a pet a, keeper David de Gea-a'n a man theih loh avangin Croatia an chak.

Spain an chuai?

Spain-in inkhelh chhung zawngin 68% ball chang mah se tlarhnunga an fimkhur tawk loh an tuar a, tharum ngah Croatia hmatawng an tlarhnungten an ngam meuh lo.

Inkhel ṭan tir lama Ramos chetsual vanga Perisic pet goal lohte, De Gea chetsual vanga Rakitic-a'n crossbar a pet per leh Tin Jedvaj-a shot De Gea dan per Marko Pjaca-a khung lohte kha enin Spain tan pumpelh theih vek niin a lang a, kuminah champion leh an tum a nih chuan Spain tan insiamṭhat a ṭul ang.

Player pawimawh midfielder Luka Modric leh striker Mario Mandzukic te tel loa khel Croatia player-te thawh-rimna erawh hmuh hmaih theih a ni lo. Tlarhnungah awmze neia in remkhawmin an ding khawng tlat a, field sirah player tharum ngah Perisic leh captain Darijo Srna te an hmuhnawm takzet bawk.

Thukhawchang

Spain manager Vicente del Bosque chuan, "Ka player-te an ngui a, an chak zo lo hi pawi an ti a ni. Ball kan kenin kan venghim zo ṭhin lo a, counter-attack lo do let turin kan inbuatsaih ṭha lo bawk. Mahse, inelna aṭangin kan la tla lo a, zanin hi insiam-
ṭhat nan kan hmang tur a ni," a ti.

Croatia boss Ante Cacic chuan, "Ka player-te hian ram tana awmdan tur leh khelh dan tur a takin an lantir a ni. Result ropui tak a ni a, inrintawkna nasa tak nen kan match lehah chuan kan khel thei ang," tiin an chak chu a lawm hle.

Turkey an vul

An match hmasa pahniha beisei an phak loh hnuah Turkey player-ten sawiselna an tawk nasa a, Thawhlehni zan khan khelmual chhungah anmahni sawiseltute chhangletin Czech Republic chu 2-0 in an hneh.

Turkey tan minute 10-na lekah Burak Yilmaz chuan goal hmahruai a khung a, Beijing Guoan striker goal khung hnuah Czech Republic an harh zawk - Turkish keeper Volkan Babacan-a'n hna a ngah sawt. Goal khung lehtu erawh Turkey tho an ni.

Minute 65-naah Ozan Tufan chuan Turkey goal hnihna ni turin yard 10 vela hla aṭangin a pet goal a, Czech tan defender Tomas Sivok-a'n goal post a pet per chu a ui khawp ang.

Czech Republic keeper Petr Cech-a'n Euro-a a inlan tawhna zawng zawngah goal 21 a chhuah a, Arsenal keeper aia European championship-a goal chhuah hnem hi an la awm lo.

Turkey tana goal hmahruai khung-tu forward Burak Yilmaz chuan inkhelh zawhah anmahni sawi-seltute chhangletin, "Kan chung-chang thu hi nasa taka ziah leh sawi a ni a, player kan ni a, kan ngaihdan leh rilru pawh zawh kan ni lo. Mipuite hian kan squad-ah eng thil nge thleng pawh hre loin nasa takin min sawisel a, zaninah khan kan ngaihtuahna leh rilru zawng zawng chu kan game-ah kan pe tih a lang a ni," tiin ram tana inpe tawk loa puh an nihna a chhanglet.