I League club leh I League 3 club chu kan danglam ve tur alawm - Aizawl FC coach

LZ Juice MPL11-ah vawiin chhun dar 12:30 hian final tenau khelh a ni dawn a, champion rinkai pahnih Chanmari FC leh Aizawl FC te an inkhel dawn. Club pahnih hi MPL ṭantirh aṭanga season tina la tel vek an ni a, tualchhung football tan an hlu dun hle.

Season liam ta khan Chanmariin champion tumin player ṭha an seng lut a, final-ah an vanduai. Kuminah MPL champion thiam manager Lalsangzuala Hmar an la lut a, nomawi chawi ngei an tum. Chutihrualin MPL-a champion ngun ber Aizawl FC-in Chanmari FC nen huang khata awm an tum lo.

Tu nge ropui zawk?

MPL hmasa ber aṭangin Chanmari FC leh Aizawl FC te hian thawm an nei ring a, mahse hetih hunlaia club ngelnghet zawk Dinthar FC leh Mizoram Police FC te an tluk lo.

Chanmari erawh coach ṭha H. Vanlalthlanga an lakluh hnuah an insiamrem a, MPL1 tawp lamah an chet ṭhat em avangin MPL2 an thunun dawn niin a lang ṭan der tawh.

Rinlawk ang ngeiin Thlanga hnuaiah Chanmari FC an champion chho a; I Day Football, MFA Cup leh MFA Super Cup bakah MPL2 nomawi te chu Chanmari FC-in an kawl nghal.

Mahse, club tum sang zawk Aizawl FC-in K. Malsawmkima hoin MPL nomawi an chhuhsak a, I League khel turin an inpettling bawk. AFC hian MPL3 leh MPL4 nomawi an chawi a, I League nomawi hial an chawi bawk avangin Mizo club ropui ber an ni.

Chanmari FC-in Thlanga thachhangdawltu ni ṭhin Sanga chu head coach-ah lain MPL5-ah an champion a, coach an chelh theih loh avangin nomawi pawh an chân. Aizawl FC erawh I League an khelh miau avangin an squad a chhah ṭha a, MPL7 leh MPL8-ah champion lehin vawi li champion thei hmasa ber an ni.

Covid-19 vangin MPL khelh theih a ni lo a, MPL khelh theih hnuah club inthurualin foreign player la lo turin inremna an siam a, tunah chuan AIFF-in state league-ah foreigner lak a rem ti lo hrim hrim.

Aizawl FC-in foreigner lak theih loh hnuah nomawi an chawi tawh lo. Chutihrualin tun ṭuma Chanmari FC enkawltu Sanga erawhin mak takin Chawnpui FC a champion pui a, mahni puala club hrang pathum champion pui thei hmasa ber Coach a ni. Hei chauh hi a ni lo a, coach Thlanga a puih laia MPL nomawi chhiar telin Aizawl FC champion zat (vawi li) chu a champion tling.

Nihna hria AFC

Aizawl FC hi MPL-a vawi li an champion tawh bakah I League-ah an champion tawh a, an champion lai hian I League hi India rama football inelna sang ber a ni. AFC coach Victor Lalbiakmawia chuan, "I League club leh I League 3 club chu kan danglam ve tur alawm," tiin Vanglaini a hrilh a, Chanmari nen huang khata awm a duh lo.

Mizo club hian season riat ngawt I League an khelh tawh avangin MPL club dangte aia indah sang thei dinhmunah an ding. Tun season-ah Chanmari hian I League 3 an khel dawn a, I League khel turin kawng a la thui a; India ram football inkhai diat chhoh dan aṭanga thlir chuan Aizawl FC hnuaiah an awm tih chu a chiang a ni.

Mahse, tualchhung football bik thlir chuan Chanmari FC hian Aizawl FC hi an chungah an dah bik lo. Season hnuhnung berah Chanmariin MPL10 final an khelh laiin Aizawl FC-in semifinal an khel pha lo. I Day Football final-ah tun ṭuma Chanmari coach Sanga enkawl Chhinga Vengin I League club hi hnehin nomawi an chawi.

Player ṭha rual

Aizawl FC leh Chanmari FC hi Mizo player ṭhate khelh châkna a ni a, chuvangin player pawh an nei ṭha ve ve. AFC-in I League an khelh avangin player an hip hret a, kuminah erawh player neih sa an chhuah ve nual avangin I League club hi an ṭha zawk bik lo.

Chanmari hian Aizawl FC midfielder K. Hmangaihkima an chhuhsak a, tualchhung player ṭha ṭha an la lut. Goalkeeper Zothanmawia leh RS Lallawmzuala te an awm avangin goal vengtu chu an nei ṭha zawk a tih theih.

Tlarhnungah tawnhriat nei ṭha Lalrinchhana Tochhawng an kawl a, Aizawl FC-in Lalchhawnkima an nei ve bawk. Defence-ah pawh CFC-in la chhawr lo mah se Sena Ralte te an kawl avangin Aizawl FC an la el pha a, coach chhawr thiam danah a innghat.

Mual laia khel turin CFC-in Bengaluru FC-a hmun pawimawh chang pha tawh ṭhin Malsawmzuala kawl mah se Aizawl FC hian tun hnaia player chhuak ṭha ber zinga mi Lalthankhuma (TK-a) an kawl - hetah pawh hian an la intluk tawk zel.

I League club hi mual sir aṭanga goal nawr turin an ṭha zawk. MPL10-a Chanmari FC final luhpuitu Laltlanzova chu FC Goa aṭangin loan hmangin an la chhuak a; Augustine Lalrochana leh Lalbiakdika te an neih sa bakah Sawma Tlangte an neih belh.

Mahse, Aizawl FC hi an inthuam ṭhat loh chuan Chanmari hian striker an nei ṭha zawk! Chutihrualin CFC chhuanvawr Lalkhawpuimawia chu inhliam vangin a la khel thei lo a, mahse Lalnunzama a la awm tho a, a thlawp turin MS Dawngliana a awm.

AFC striker C. Lalhriatpuia'n match hmasa pahnihah goal a khung a, Farkawn tlangval hian theihna a nei sang a, a theihna anga a khelh chhuah theih chuan I League club hian striker dang an melh tawh kher lo ang. Mahse, Hriata hian Aizawl FC thuneitute hmin turin hmabak a nei a, vawiin hi a lantir hun chu a ni.

Engtin zel?

Chanmari FC coach Lalsangzuala Hmar chuan, "Bethlehem, Mizoram Police leh Chawnpui te hi an ṭha vek a, mahse Aizawl FC hi chu an danglam. I League club hi kan tan fiahna a ni dawn a, eng ang chiaha ṭha nge kan nih chu a hriat ang. Aizawl FC hmachhawn tur hian kan inpeih a, kan phur bawk," tiin Vanglaini a hrilh.

Tun season MPL-ah hian League Winner lawmman a awm dawn a, league round-a pakhatna nih hi a pawimawh lehzual tawh. Hei vang hian tun ṭum inkhel tur pawh hi 'final tenau' tia sawi hi a inhmeh hle.

Aizawl FC coach Victor Lalbiakmawia chuan, "League round-a pakhatna nih kan duh chuan Chanmari FC hi kan hneh a ṭul a, draw a thiang lo - chak a ngai. Chanmari lakah hian I League club kan nihna kan lantir tur a ni," tiin Vanglaini a hrilh a, inkhelh hma hauhin boruak a nung hle.