Tlai dar 3:30-ah club intiat tawk: Sihphir Venghlun vs Ramhlun Athletic

LZ Juice MPL11-ah Sihphir Venghlunin harhtharna changing FC Bethlehem 4-2 in an hneh a, vawiin tlai dar 3:30 hian an ṭha tak tak em, tih chu Ramhlun Athletic lakah fiahin a awm dawn.

MPL club thar pahnih hian point thum ve ve an hmu tawh a, an khelh tawh chin aṭanga thlir chuan club pahnih hi intluk tawk viau tura ngaih a ni. Ramhlun club tan Felix Lalruatsanga'n goal hmangin hming a chher a, Serchhip tlangval hian goal nga a khung der tawh.

Chutihrualin Felix ringawt hi MPL-a inkhel entute mit la a ni lo. Richard Lalramnunpuia pawhin MPL khelh hmasak berah theihna sang tak a nei tih a lang a, tharum a ngah avangin Aizawl FC tlarhnung pawh an buai thei hial - Richard erawhin goal a la khung lo thung.

Ramhlun midfield-ah hian Lalawmpuia Hnamte leh Flavius Lalruatkima te an awm a, Danny Lalduhawma hote hian Sihphir Venghlun lakah point thum an beisei ngam ang. Chutihrualin Sihphir Venghlun an kim chho ṭan a, Bethlehem laka goal hnih khungtu PC Lalruatsanga hi en bik tur zinga mi a ni.

Malsawmtluanga Pautu leh FC Goa tana khel tawh Lalawmpuia te an awm bawk avangin Sihphir Venghlun goal bawh a na thar a, MPL round hmasa pahniha an chak loh hnuah nasa takin an insiamṭha a tih theih.

Hei bakah hian Ramhlun Athletic leh Sihphir Venghlun te hi inkhel entu nei ṭha ve ve an ni a, tlai ni nemah an khelh dawh bawk avangin entu an nei ṭha lehzual ang.