Nadal hnehin Borges a champion

Olympic khel tura inbuatsaih lai Rafael Nadal chuan a duhthusama ṭhain Swedish Open a mangṭha thei lo, nomawi inchuhna inkhel hmuhnawmah Nadal hian Nuno Borges a hneh lo a ni.

Pathianni zan final inkhelah world number 51 Nuno Borges hian Nadal hi 6-3, 6-2 in a hneh a, seeded pasarihna hian hnehna chang tur hian darkar khat leh minute 27 chhung hun a hmang.

Portuguese mi Borges chuan, "Ka lawmzia hi ka sawi chhuak thiam mai lo zawk, hetiang hun tawng tur hian hun rei tak ka lo nghak tawh a, a ropuina belhchhah turin player ṭha tak ka hneh a ni," tiin a sawi.

Chak lo zawk Nadal tan lawm a harsa mai thei, chutihrualin hun rei tak chhung hliam vangin a chawl a, chumi hnuah inkhel ve leh ṭan chauh a nih avangin final a thleng pawh kha a tan lawmna tur a tling ngei ang.

Grand Slam vawi 22 champion tawh Nadal chuan, "Chawlhkar khat chhung ngawt mai ṭha leh nuam ti em emin tennis ka khel ve leh thei ta a ni a, final ka khelh dan kha ka chet ṭhat ber ṭum erawh a ni lo thung.

"Chutihrualin Nuno khan hnehna chan phu khawpin a khel chhuak ve thung a, ka lawmpui hle a ni. Hetiang lawmna chan hi thil awlsam a ni lo a, chuvangin a champion avangin hlim takin awm se ka duhsak," a ti.

Nadal hian Paris Olympic khelh ngei a tum a, hei vang hian grass court inelna lian Wimbledon pawh khel loin training a nei zawk a, tunah clay court lamah inbuatsaihna a nei zui ta zawk a ni.

Olympic tennis bik hi July 27 aṭangin Paris khawpuiah an khel dawn - France Open khelhna chu inelna neihna tur hmun a nih avangin Nadal a mikhual dawn lo hle a, mipui mit fukna pawh a ni ang.